News - Daily Kesari

क्रीडा

बावुमा लंगडत धावताना संपूर्ण लॉर्ड्स भारावून बघत राहिले

Wrutuja pandharpure
15 Jun 2025

लॉर्डस : वर्ल्ड टेस्ट चॅम्पियनशिप फायनलच्या मैदानावर अनेक चांगले क्षण घडले, पण ज्याने सर्वांच्या मन घर केले तो म्हणजे दक्षिण आफ्रिकेचा कर्णधार टेम्बा बावुमा. सामना सुरू असताना बावुमाच्या पायाला दुखापत झाली होती. साध्या शब्दांत सांगायचं तर तो लंगडत होता. पण तो शेवटपर्यंत मैदानावर लढत राहिला, धावत राहिला, संघासाठी झुंजत राहिला. लॉर्ड्समधील हजारो प्रेक्षक आणि सहकार्‍यांनी त्याचा हा संघर्ष पाहून जोरदार दाद दिली.

अंतिम सामन्याच्या तिसर्‍या दिवशी दोन बळी पडल्यानंतर कर्णधार बावुमा मैदानावर आला आणि त्याने सलामीवीर एडेन मार्करामला चांगली साथ दिली. बावुमाने दुखापतीशी झुंजताना कर्णधारपदाची खेळी केली आणि मार्करामसोबत नाबाद शतकी भागीदारी करून संघाला कठीण परिस्थितीतून बाहेर काढले. या दोघांच्या खेळीच्या जोरावर दक्षिण आफ्रिका २७ वर्षांनंतर पहिले आयसीसी जेतेपद जिंकण्याकडे वाटचाल करत आहे.

कर्णधार टेम्बा बावुमा चौथ्या क्रमांकावर फलंदाजीसाठी आला. आतापर्यंत त्याच्या बॅटवरून ५ चौकार लागले आहेत. बावुमाचे हे कसोटीतील २५ वे अर्धशतक आहे. त्याने पहिल्या डावातही चांगली फलंदाजी केली. तिसर्‍या दिवसाच्या खेळाच्या अखेरीस त्याने १२१ चेंडूत ६५ धावा केल्या आहेत. फलंदाजी करताना बावुमा क्रॅम्प्सशी झुंजत होता. वर्ल्ड टेस्ट चॅम्पियनशिपच्या अंतिम सामन्यात कर्णधाराने केलेली ही सर्वोच्च धावसंख्या आहे. त्याने केन विल्यमसनचा विक्रम मोडला. २०२१ मध्ये, विल्यमसनने भारताविरुद्ध चौथ्या डावात नाबाद ५२ धावा केल्या होत्या.