News - Daily Kesari

गुन्हेगारी जगत

भोंदू बाबाच्या कोठडीत वाढ

Wrutuja pandharpure
03 Jul 2025

पुणे : दैवी शक्ती प्राप्त झाल्याची बतावणी करून भक्तांशी अश्‍लील चाळे करणार्‍या भोंदू बाबाच्या पोलिस कोठडीत 4 जुलैपर्यंत वाढ करण्याचे आदेश न्यायालयाने दिले. प्रसाद दादा भीमराव तामदार (वय 29, रा. सूस गाव, मुळशी) असे पोलिस कोठडीत वाढ झालेल्या आरोपी भोंदू बाबाचे नाव आहे. याबाबत एकाने बावधन पोलिस ठाण्यात फिर्याद दिली होती.

त्याच्या पोलिस कोठडीची मुदत संपल्यानंतर त्याला शिवाजीनगर न्यायालयात हजर करण्यात आले होते. आरोपीकडून पोलिसांनी तीन मोबाईल, एक डिजिटल पॅड, सहा पेनड्राइव्ह, चार मेमरी कार्ड, तसेच निद्रानाशावरील गोळ्यांचे पाकीट जप्त केले आहे. आरोपी बाबाने एका अ‍ॅपद्वारे भक्तांचे चित्रीकरण केले. त्याने अनेकांची फसवणूक केल्याची दाट शक्यता आहे.

फसवणूक करून मिळविलेल्या पैशांमधून त्याने मालमत्ता खरेदी केली का? तसेच, त्याची संस्था कायदेशीर आहे का? यादृष्टीने तपास करायचा असल्याने तामदार याच्या पोलिस कोठडीत वाढ करण्याची विनंती तपास अधिकारी पोलिस उपनिरीक्षक सारंग ठाकरे आणि सरकारी वकील विजयसिंह जाधव यांनी न्यायालयात केली.