News - Daily Kesari

महाराष्ट्र

भरधाव मालमोटारीने दोघांना चिरडले; बुलडाण्यातील घटनेमुळे जमाव संतापला

Wrutuja pandharpure
24 May 2025

बुलडाणा : वाळू वाहतूक करणार्‍या भरधाव मालमोटारीने झाडाखाली बसलेल्या दोघांना चिरडले. यात दोन्ही तरूण गंभीर जखमी असून, त्यांच्यावर रूग्णालयात उपचार सुरू आहेत. बुलडाणा जिल्ह्यातील जळगाव जामोद तालुक्यात शुक्रवारी सकाळी हा अपघात झाला.

काशिनाथ झाल्टे (वय ४०) व समाधान काळे (५५) हे दोघे दादुलगाव बसस्थानक परिसरात झाडाखाली बसले होते. त्याचवेळी वाळू वाहतूक करणार्‍या भारधाव वेगातील मालमोटारीने त्यांना चिरडले. या अपघातात काशिनाथ आणि समाधान हे गंभीर जखमी झाले आहेत. त्यांना उपचारासाठी खामगाव येथील रुग्णालयात दाखल करण्यात आले आहे.

दरम्यान, अवैध्य गौण खनिज आणि वाळू वाहतूक करणार्‍या मालमोटारींचे या भागात सातत्याने अपघात होत असल्याने संतप्त जमावाने अपघातग्रस्त मालमोटार पेटवून दिली. पंधरा दिवस अगोदरच तालुक्यातील माऊली फाट्यावर एका मालमोटारीच्या अपघातात दोन चिमुकले व आजींचा मृत्यू झाला होता. स्थानिक पोलीस प्रशासनाने अवैध वाहतूक करणार्‍या वाहनांवर कारवाई करावी, अशी मागणी होत आहे.