ब्रेकिंग

देश

ज्योती मल्होत्रा हिच्या कोठडीत वाढ

Samruddhi Dhayagude
23 May 2025

हिसार : पाकिस्तानसाठी हेरगिरी केल्याच्या आरोपाखाली अटकेत असलेल्या हरयानाच्या यूट्यूबर ज्योती मल्होत्रा हिच्या पोलिस कोठडीत येथील न्यायालयाने गुरुवारी चार दिवसांची वाढ केली.ज्योती हिला याआधी सुनावलेली पाच दिवसांच्या पोलिस कोठडीची मुदत काल संपणार होती. त्यामुळे, तिला न्यायालयासमोर हजर करण्यात आले होते. त्यावेळी न्यायालयाने तिच्या कोठडीत वाढ केली.

पाकिस्तानसाठी हेरगिरी करत असल्याच्या संशयावरून पंजाब, हरयाना व उत्तर प्रदेशातून अटक करण्यात आलेल्या १२ जणांपैकी ज्योती एक आहे. हिसारची रहिवासी असलेली ज्योती ही यूट्यूब चॅनल चालवत होती. गेल्या आठवड्यात ज्योतीला हिसारमधील न्यू अग्रसेन एक्स्टेंशन येथून अटक झाली होती. ज्योती नोव्हेंबर २०२३ पासून पाकिस्तानी उच्चायोगातील कर्मचारी एहसान-उर-रहीम उर्फ दानिशच्या संपर्कात होती. भारताने १३ मे रोजी दानिशची हकालपट्टी केली होती.

पोलिसांनी ज्योतीचे तीन मोबाइल फोन आणि एक लॅपटॉप फॉरेन्सिक तपासणीसाठी पाठवले आहे. तसेच, तिच्या बँक खात्यांची तपासणी केली जात आहे. राष्ट्रीय तपास संस्था, गुप्तचर विभाग आणि लष्करी अधिकारी ज्योतीची चौकशी करत आहेत. तिने पाकिस्तान, चीन, बांगलादेश आणि इतर काही देशांना भेट दिली होती.