ब्रेकिंग

पुण्यातील सिंहगड किल्ला गुरुवारी बंद, वनविभागाचा निर्णय

Samruddhi Dhayagude
28 May 2025

पुणे : मान्सून मुंबई पुण्यासह सोलापूरपर्यंत पोहोचला. येत्या तीन ते चार दिवसांत राज्यातील ८० टक्के भाग मान्सूनने व्यापला जाईल. पुढील ४८ तासांमध्ये पावसाचा जोर वाढण्याची शक्यता आहे. प्रचंड पावसामुळे शहरी भागातही रस्त्यांवरून नद्या वाहू लागल्या आहेत. अशा परिस्थितीत घाट परिसरातही धोका निर्माण झाला आहे. त्यामुळे नागरिकांच्या सुरक्षिततेच्या दृष्टिकोनातून पुण्यातील सिंहगड किल्ला गुरुवारी बंद ठेवण्यात येणार असल्याचे वनविभागाकडून सांगण्यात आले आहे.

जोरदार पावसाने घाट परिसरात धोका निर्माण झाला आहे. दरडी कोसळण्याच्या घटना घडू लागल्या आहेत. सध्या पुणे शहर आणि घाट परिसरात सुरू असलेल्या अतिवृष्टीमुळे दरड कोसळण्याचा धोका निर्माण झाला आहे. ही अतिवृष्टी पुढील काही दिवस राहणार असल्याने हवामान विभागाने सतर्कतेचा इशारा दिला. त्यामुळे नागरिकांच्या सुरक्षिततेच्या दृष्टिकोनातून तसेच गुरुवारी (दि. २९) होणाऱ्या आपत्ती निवारणाच्या शासकीय पाहणी दौऱ्याच्या अनुषंगाने, सिंहगड किल्ला बंद ठेवण्यात येणार आहे, अशी माहिती वन विभागाकडून देण्यात आली. यामध्ये ट्रेकिंगसाठी येणाऱ्या पर्यटकांनाही बंदी घातली असून कल्याण दरवाजा, आतकरवाडी तसेच इतर सर्व पायी मार्गांनी प्रवेश करण्यासही बंदी घातली आहे. नागरिकांनी सहकार्य करून प्रशासनास मदत करावी, असे आवाहनही उपवनसंरक्षकांनी केले आहे.