News - Daily Kesari

विदेश

रशियाकडून हल्ल्याची भिती; जर्मनीकडून बंकर उभारणीला सुरुवात

Samruddhi Dhayagude
09 Jun 2025

बर्लिन : पुढील चार वर्षांत रशिया दुसर्‍या युरोपीय देशांवर हल्ला करू शकतो, अशी भीती असल्याने जर्मनीने बंकर उभारणी आणि आश्रयस्थानांचे जाळे वाढवण्याची तयारी सुरू केली असल्याचे वृत्त समोर आले आहे.

बर्‍याच काळापासून जर्मनीमध्ये असा व्यापक समज होता, की युद्ध परिस्थिती येणार नाही. मात्र, आता आपल्याला तयारी करण्याची आवश्यकता आहे. युरोपमध्ये सुरू असलेल्या मोठ्या आक्रमक युद्धाच्या धोक्याबद्दल आम्हाला काळजी वाटते, असे फेडरल ऑफिस फॉर सिव्हिल प्रोटेक्शन अँड डिझास्टर सपोर्टचे प्रमुख राल्फ टिश्लर यांनी एका वृत्तसंस्थेला सांगितले.

युक्रेनमध्ये सुरू असलेल्या तीन वर्षांच्या युद्धानंतर, रशिया २०२९ पर्यंत उत्तर अटलांटिक करार संघटनेच्या (नाटो) देशाला लक्ष्य करू शकतो. जर्मन संरक्षण प्रमुख जनरल कार्स्टेन ब्रॉअर यांनी गेल्या आठवड्यात एका माध्यमाशी बोलताना सांगितले, की रशिया दरवर्षी शेकडो रणगाडे बनवत आहे. जे २०२९ पर्यंत किंवा त्यापूर्वी बाल्टिक प्रदेशातील नाटो देशांवर हल्ला करण्यासाठी वापरले जाऊ शकतात.

दरम्यान, जर्मनी नवीन बंकर बांधण्याऐवजी विद्यमान संरचना वापरण्यावर लक्ष केंद्रित करत आहे, कारण नवीन बंकर बांधण्यास बराच वेळ जाऊ शकतो आणि ते खर्चीक देखील आहे.