News - Daily Kesari

गुन्हेगारी जगत

पत्नीच्या कानाखाली मारणे म्हणजे छळ नव्हे...!

Wrutuja pandharpure
29 May 2025

हगवणे यांच्या वकिलाचा न्यायालयात युक्तीवाद ? । सासरा व दिराला तीन दिवसांची कोठडी

पुणे : वैष्णवी हगवणे मृत्यू प्रकरणात अटकेत असलेल्या आरोपींच्या पोलिस कोठडीत वाढ करण्यात यावी, अशी मागणी न्यायालयात पोलिसांनी केली. मात्र, पोलिस कोठडीला विरोध करताना हगवणे यांच्या वकिलांनी वैष्णवीच्या चारित्र्यावर संशय घेतला. वैष्णवी नको त्या व्यक्तीशी चॅट करायची. वैष्णवीची प्रवृत्ती आत्महत्या करण्याची होती. तसेच, पतीने पत्नीच्या कानाखाली मारणे म्हणजे छळ नव्हे, असा युक्तीवाद हगवणे यांच्या वकिलांनी न्यायालयात केला. दरम्यान, वैष्णवीची सासू, पती आणि नणंदेला एक दिवसाची तर सासरे आणि दिराला तीन दिवसांची पोलिस कोठडी न्यायालयाने सुनावली.

या प्रकरणात सासू लता हगवणे, नणंद करिश्मा हगवणे, पती शशांक हगवणे, सासरा राजेंद्र हगवणे आणि दीर यांच्या पोलिस कोठडीची मुदत संपल्याने त्यांना काल शिवाजीनगर न्यायालयात हजर करण्यात आले. यावेळी हगवणे यांच्या वकिलांनी हा युक्तीवाद केला. न्यायाधीशांनी आरोपींना पोलिस कोठडी दरम्यान पोलिसांकडून काही त्रास झाला का? हे विचारले असता सर्वांनी नाही, असे उत्तर दिले. शवविच्छेदनाच्या अहवालामध्ये वैष्णवीच्या अंगावर मारहाणीचे अनेक जखमा असल्याचे नमूद आहे. तिचा छळ झाला असल्याचा आरोपही वैष्णवीच्या आई-वडिलांनी केला आहे.

हगवणे यांच्यावतीने वकिलांनी न्यायालयात म्हटले की, एखाद्या पतीने पत्नीच्या कानाखाली मारल्या म्हणजे तो छळ होत नाही. आमच्यावर ४० लाखांची मोटार घेतल्याचा आरोप केला जात आहे. परंतु, आमच्या घरात ५ कोटींच्या मोटारी आहेत. वैष्णवी नको त्या व्यक्तीशी चॅटींग करायची. त्यामुळे त्या व्यक्तीने तिला त्रास दिला असेल.या त्रासातून वैष्णवीने आत्महत्या केली असावी. हगवणे यांच्या वतीने वकील विपुर दोशी यांनी पोलिस कोठडीला विरोध केला. पोलिस कोठडी देण्याची काही गरज नाही. हगवणे यांनी सोने कोणत्या बँकेत ठेवले आहे, हे आधीच सांगितले आहे. तसेच, मोबाइल चॅट व्हायरल झाले असल्याने चॅट लपवण्याच्या दाव्यात तथ्य नाही. वैष्णवी नको त्या व्यक्तीशी चॅट करायची. आम्ही ते पकडले. तिच्या आत्महत्येचे मुख्य कारण वेगळे आहे; पण पोलिस ते शोधत नसल्याचा आरोपही वकिलांनी न्यायालयात केला.

सरकारी वकिलांचा युक्तीवाद

आरोपींचे मोबाईल सापडलेले नाहीत. फरारी आरोपी निलेश चव्हाण कुठे आहे? याची चौकशी करायची आहे. आरोपींनी हुंड्यात मिळालेले ५१ तोळे सोने बँकेत तारण ठेवले आहे. त्याची माहिती घ्यायची आहे. आरोपींनी वैष्णवीला ज्या हत्याराने मारहाण केली. ती सर्व हत्यारे हस्तगत करायची आहेत, असा युक्तीवाद सरकारी वकिलांनी न्यायालयात केला.