News - Daily Kesari

विदेश

भारताच्या ’वॉटर बॉम्ब’मुळे पाकिस्तानवर उपासमारीची वेळ

Wrutuja pandharpure
25 May 2025

पीटीआयच्या खासदाराचा संसदेत इशारा

इस्लामाबाद : पहलगाम येथे झालेल्या दहशतवादी हल्ल्यानंतर भारताने सिंधू पाणी करार स्थगित केला. यावर ’भारताने ’वॉटर बॉम्ब’ फेकला आहे. हा प्रश्न तात्काळ सोडवला गेला नाही तर पाकिस्तान उपासमारीने मरेल,’ असा इशारा पाकिस्तानचे खासदार सय्यद अली जफर यांनी संसदेत दिला आहे.

पाकिस्तानी संसदेत सिंधू पाणी करार पुढे ढकलण्याबाबत चर्चा झाली. खासदार सय्यद अली जफर म्हणाले, पाण्याचा प्रश्न पाकिस्तानसाठी दहशतवादाच्या मुद्द्याइतकाच महत्त्वाचा आहे. हे देखील आपल्यावर लादलेले युद्ध आहे. २१ व्या शतकातील युद्धे पाण्यावरून लढली जातील. हे आज खरे सिद्ध होत आहे. जर आपण हा पाण्याचा प्रश्न सोडवला नाही तर आपण उपासमारीने मरू शकतो.

पाकिस्तान हा पाण्याने तहानलेला देश आहे. हवामान बदल आणि लोकसंख्या ही याची दोन कारणे आहेत. सिंधू खोरे ही आपली जीवनरेखा आहे. तीन चतुर्थांश पाणी बाहेरून येते. १० पैकी ९ लोक सिंधू जल खोर्‍याच्या मदतीने आपले जीवन जगत आहेत. ९० टक्के पिके या पाण्यावर अवलंबून आहेत. त्यामुळे हे दहशतवादाइतकेच महत्त्वाचे आहे.

सय्यद अली जफर हे विरोधी पक्ष पाकिस्तान तहरीक-ए-इन्साफचे खासदार आणि वकील आहेत. त्यांनी २०१८ मध्ये पाकिस्तानचे काळजीवाहू कायदा आणि न्याय मंत्री म्हणून काम पाहिले. २०१५-१६ मध्ये पाकिस्तान सर्वोच्च न्यायालयाच्या बार असोसिएशनचे ते अध्यक्ष होते. सध्या ते पंजाबचे सिनेटर आणि पीटीआयचे संसदीय नेते म्हणून काम करत आहेत. मार्च २०२१ पासून ते पाकिस्तानच्या सिनेटचे सदस्य म्हणून काम करत आहेत.