News - Daily Kesari

केंद्रीय गृहमंत्री अमित शहा महाराष्ट्राच्या दौर्‍यावर

Wrutuja pandharpure
25 May 2025

मुंबई, (प्रतिनिधी) : केंद्रीय गृहमंत्री अमित शहा तीन दिवसांच्या महाराष्ट्र दौर्‍यावर येत आहेत. आज (रविवारी) रात्री त्यांचे नागपूर येथे आगमन होणार आहे. सोमवारी ते नागपूर आणि नांदेड येथील कार्यक्रमांना उपस्थित राहतील. तर, मंगळवारी त्यांचे मुंबईत कार्यक्रम आहेत. त्याच दिवशी ते कार्यक्रमानंतर दुपारी दिल्लीकडे रवाना होतील.

शहा आज रात्री साडेनऊ वाजता नागपूर येथे दाखल होतील. सोमवारी सकाळी जामठा येथील नॅशनल कॅन्सर इन्स्टिट्यूट येथील स्वस्ति निवास पंथागारच्या भूमिपूजनाच्या कार्यक्रमाला उपस्थित राहतील. दुपारी १ वाजता चिंचोली येथील एनएफएसयूच्या स्थायी परिषदेच्या भूमिपूजनाला ते उपस्थित राहतील. त्याच दिवशी दुपारी ३ वाजता ते नांदेडला पोहोचतील. दुपारी नांदेड येथील आनंदनगरातील माजी मुख्यमंत्री वसंतराव नाईक यांच्या प्रतिमेचे ते अनावरण करतील. दुपारीच ते कुसुम ऑडिटोरियम येथे बैठक घेणार आहेत. सायंकाळी नांदेडमध्ये त्यांची सभा होणार आहे.

सोमवारी रात्री त्यांचे मुंबईत आगमन होईल. मंगळवारी सर कावसजी जहांगीर सभागृह येथे स्वातंत्र्यवीर विनायक दामोदर सावरकर यांच्या ६० व्या पुण्यतिथीनिमित्त शहा यांचे व्याख्यान आयोजित करण्यात आले आहे. माधवबाग संकुलातील प्रसिद्ध लक्ष्मी नारायण मंदिराला १५० वर्ष पूर्ण झाल्यानिमित्त २७ मे रोजी जयंती उत्सवाचे आयोजन करण्यात आले आहे. मुंबईच्या सांस्कृतिक आणि आध्यात्मिक वारशासाठी हा एक ऐतिहासिक क्षण असल्याने या कार्यक्रमासाठी शहा आणि मुख्यमंत्री देवेंद्र फडणवीस हे उपस्थित राहणार आहेत. या प्रसंगी मंत्री मंगलप्रभात लोढा तसेच विधानसभा अध्यक्ष राहुल नार्वेकर हे देखील उपस्थित राहणार आहेत.