News - Daily Kesari

गुन्हेगारी जगत

मोटारीने नेले दीड किलोमीटर फरफटत

Wrutuja pandharpure
23 May 2025

महिला ठार, पती जखमी

सातारा, (प्रतिनिधी) : गुढे-काळगाव रस्त्यावर वायचळवाडी (ता. पाटण) जवळ बुधवारी रात्री मृतावस्थेत आढळलेल्या महिलेची ओळख पटली आहे. कविता माणिक वारे (वय-४३, रा. भागाईवाडी, ता. शिराळा) असे मृत महिलेचे नाव आहे.पतीसमवेत घराकडे परतत असताना तळमावलेनजीक (ता. पाटण) अनोळखी मोटारीने धडक देऊन त्यांना सुमारे दीड किलोमीटरपर्यंत फरफटत नेल्याचा धक्कादायक प्रकार पोलिसांच्या तपासात समोर आला आहे. या अपघातात त्यांचे पती माणिक वारे (वय-४७) हेही जखमी झाले झाले आहेत. आहेत.

अपघाताची नोंद येथील पोलिस ठाण्यात झाली आहे. गुढे-काळगाव रस्त्यावर वायचळवाडीजवळ काल रात्री अनोळखी महिलेचा मृतदेह सापडल्याचे निदर्शनास आले. नागरिकांनी त्याबाबत येथील पोलिसांना कळवले. सहायक पोलिस निरीक्षक डॉ. प्रवीण दाईंगडे व त्यांचे सहकारी तातडीने घटनास्थळावर पोहोचले. संबंधित महिलेला गंभीर दुखापत झाल्याचे दिसून आलेे. पोलिसांनी महिलेबाबत माहिती काढल्यावर त्यांचे नाव कविता माणिक वारे (रा. भागाईवाडी, ता. शिराळा) असल्याचे स्पष्ट झाले. त्यांच्या समवेत असलेले त्यांचे पती माणिक वारे हे जखमी स्थितीत तळमावलेजवळच्या पेट्रोल पंपाजवळ नाल्यात सापडले.त्यामुळे धडक दिलेल्या वाहनाने कविता यांना अपघात स्थळापासून सुमारे दीड किलोमीटरपर्यंत फरफटत नेल्याची धक्कादायक बाब समोर आली.

माणिक यांच्यावर तळमावल्यातील दवाखान्यात उपचार करण्यात आले. वारे दांपत्य काही महिन्यांपूर्वी या परिसरात रोजगारासाठी आले होते. विभागातील गुढे (ता. पाटण) येथे त्यांचे नातेवाईक आहेत. बुधावरी ते दोघे कर्‍हाडला कामानिमित्त गेले होते. रात्री तळमावले बसथांब्यावर उतरून घराकडे जात असताना हा अपघात झाला. अपघातस्थळी पोलिसांना मोटारीची तुटून पडलेली नंबर प्लेटही आढळली आहे. त्यावरून तसेच सीसीटीव्हीच्या आधारे पोलिसांचा तपास सुरू आहे. लवकरच अपघातग्रस्त वाहन व चालकापर्यंत पोहोचू, असा विश्वास सहाय्यक निरीक्षक डॉ. दाईंगडे यांनी व्यक्त केला.