News - Daily Kesari

महाराष्ट्र

पालखी महामार्गावर दुर्घटना मालमोटार शाळेला धडकली

Samruddhi Dhayagude
21 May 2025

सासवड,(वार्ताहर) : पुरंदर तालुक्यातून जाणार्‍या पुणे-पंढरपूर महामार्गावर सासवड नजीक खळद (ता.पुरंदर) येथील रासकरमळा येथे पहाटेच्या वेळी एक टेम्पो प्राथमिक शाळेच्या इमारतीला जाऊन धडकली. यामध्ये शाळेच्या एका वर्ग खोलीच पूर्ण नुकसान झाले आहे. सुदैवाने यामध्ये कोणीही गंभीर जखमी झाले नाही. मात्र यामध्ये शाळेच्या इमारतीचं दहा ते पंधरा लाखाचे नुकसान झाल्याचं प्राथमिक अंदाज वर्तविण्यात येत आहे.

विशेष म्हणजे या उन्हाळ्याच्या सुट्टीतच या इमारतीच्या बोलक्या भिंती रंगवण्याचे काम करण्यात आलं होतं आणि आता जूनमध्ये विद्यार्थ्यांच्या स्वागतासाठी ही शाळा तयार करण्यात आली होती.

पुणे-पंढरपूर महामार्गाचे रुंदीकरण केल्यानंतर रस्ता आता शाळेच्या इमारती पर्यंत गेला आहे. त्यामुळे भरधाव वाहनाचे नियंत्रण सुटल्यानंतर मोठा अपघात या ठिकाणी घडू शकतो. हा अपघात सुट्टीच्या दिवसात आणि रात्रीच्या वेळी घडल्याने कोणतीही मोठी जीवितहानी झाली नाही, मात्र अशा प्रकारचे अपघात घडू नयेत म्हणून बांधकाम विभागाने योग्य ती खबरदारी घ्यावी, अशी मागणी आता खळद येथील ग्रामस्थ करत आहेत.याबाबत संबंधित मालमोटार चालकावर गुन्हा दाखल करण्याची प्रक्रिया सुरू असल्याचे सासवड पोलीस ठाण्याचे पोलीस निरीक्षक ऋषिकेश अधिकारी यांनी सांगितले.