News - Daily Kesari

क्रीडा

झिम्बाब्वेच्या ब्लेसिंग मुझरबानीचा बंगळुरू संघात समावेश

Wrutuja pandharpure
20 May 2025

बंगळुरू : रॉयल चॅलेंजर्स बंगळुरूने दक्षिण आफ्रिकेचा गोलंदाज लुंगी एनगिडीच्या याच्या जागी आयपीएल प्लेऑफ सामन्यांसाठी झिम्बाब्वेच्या ब्लेसिंग मुझरबानीचा संघात समावेश केला आहे. रजत पाटीदारच्या नेतृत्वाखालील आरसीबीने प्लेऑफमधील आपले स्थान निश्चित केले आहे.

२८ वर्षीय झिम्बाब्वेचा वेगवान गोलंदाज ब्लेसिंग मुझरबानी याला लुंगी एनगिडी यांच्या जागी तात्पुरता संघात स्थान देण्यात आले आहे. एनगिडी २६ मे रोजी दक्षिण आफ्रिकेला परतेल. असे आरसीबीने अधिकृत निवेदनात म्हटले आहे.६ फूट ८ इंच उंची असलेल्या मुझरबानीने एकूण ११८ टी-२० सामने खेळले आहेत, ज्यात ७० आंतरराष्ट्रीय टी-२० सामने आहेत. त्याच्या आंतरराष्ट्रीय कारकिर्दीत तर, त्याने ७० सामन्यांमध्ये ७८ विकेट्स घेतल्या आहेत, त्याचा इकॉनॉमी रेट ७.०२ आहे. टी-२० मध्ये त्याने ११८ सामन्यांमध्ये १२७ विकेट्स घेतल्या आहेत, ज्याचा इकॉनॉमी रेट ७.२४ आहे.

झिम्बाब्वेचा हा गोलंदाज पाकिस्तान सुपर लीगमध्ये कराची किंग्ज आणि मुल्तान सुल्तान्सकडून खेळला आहे. तो सीपीएलमध्ये सेंट किट्स आणि नेव्हिस पॅट्रियट्सकडून खेळला आहे. ब्लेसिंग मुझरबानीने आयएलटी२० मध्ये १७ सामन्यांमध्ये २२ विकेट्स घेतल्या आहेत. पीएसएलमध्ये खेळलेल्या १५ सामन्यांमध्ये त्याच्या नावावर २१ विकेट्स आहेत. त्याने सीपीएलमध्ये फक्त ३ सामने खेळले आहेत आणि त्याच्या नावावर फक्त एक विकेट्स आहे.

आयपीएलच्या पहिल्या हंगामापासून खेळत असलेला आरसीबी हा संघ अजूनही त्यांच्या पहिल्या विजेतेपदाच्या प्रतीक्षेत असलेल्या संघांमध्ये समाविष्ट आहे. यावेळी आरसीबी चमकदार दिसत आहे, विराट कोहलीची बॅटही चांगली चालली आहे. आयपीएलमध्ये आतापर्यंत ६० सामने खेळले गेले आहेत, आरसीबी व्यतिरिक्त, जीटी आणि पीबीकेएसनेही प्लेऑफसाठी आपले स्थान निश्चित केले आहे. आरसीबीला लीग टप्प्यात अजून २ सामने खेळायचे आहेत. पुढचा सामना हैदराबादसोबत आहे आणि शेवटचा सामना लखनौ सुपर जायंट्ससोबत आहे.