दौंड-पुणे डेमूच्या डब्यात आग   

 

पुणे/दौंड : दौंडहून पुण्याकडे निघालेल्या डेमू रेल्वेच्या एका डब्यात सोमवारी सकाळी आग लागली. रेल्वे संरक्षण दलाने (आरपीएफ) तात्काळ ही आग विझवली. यवत रेल्वे स्थानकावर हा प्रकार घडला. सुदैवाने, या घटनेत कोणीही जखमी झाला नाही. डब्यातून धूर बाहेर पडत असल्याने प्रवाशी मात्र काही काळासाठी घाबरले होते.  
 
पुणे रेल्वे प्रशासनाने दिलेल्या माहितीनुसार, दौंडहून निघालेली ही रेल्वे सकाळी ७.५२ वाजता यवत स्थानकावर थांबली होती. त्याच दरम्यान, एक मध्यमवयीन व्यक्ती डब्यात आला आणि त्याने बिडी पेटवून स्वच्छतागृहाच्या जवळ असलेल्या कचरापेटीत टाकली. त्यानंतर डब्यातून धूर येऊ लागला. रेल्वे स्थानकावरच असल्याने रेल्वेचे कर्मचारी व रेल्वे सुरक्षा दलाने (आरपीएफ) आगीवर तत्काळ नियंत्रण मिळवले. त्यानंतर, ८.१४ वाजता रेल्वे स्थानकावरून रवाना झाली, अशी माहिती मध्य रेल्वेच्या पुणे विभागाचे जनसंपर्क अधिकारी हेमंतकुमार बेहरा यांनी दिली.
 
या घटनेनंतर संबंधित व्यक्तीस रेल्वे पोलिसांनी ताब्यात घेतले. तो मुळचा मध्यप्रदेशातील रहिवासी असून भिक्षेकरी आहे. वैद्यकीय तपासणीनंतर पुढील कार्यवाही कारवाई करण्यात येईल, असे वरिष्ठ विभागीय सुरक्षा आयुक्त आरपीएफच्या प्रियांका शर्मा यांनी सांगितले.
 

Related Articles