ब्रेकिंग

महाराष्ट्र

इमारतीचा स्लॅब कोसळून सहा जण ठार

Samruddhi Dhayagude
21 May 2025

कल्याण : कल्याण पूर्वेतील चिकणीपाडा भागात मंगळवारी दुपारी श्री सप्तश्रृंंगी या धोकादायक इमारतीचा स्लॅब कोसळला. यात सहा जणांचा मृत्यू झाला. यामध्ये तीन बालकांचा समावेश आहे. चार जखमींवर पालिका आणि खासगी रूग्णालयांत उपचार सुरू आहेत.

चिकणीपाडा येथील श्री सप्तश्रृंगी इमारतीचे बांधकाम सन २००६ मध्ये करण्यात आले आहे. ही इमारत चार मजल्याची आहे. एका माजी नगरसेविकेच्या सहकार्याने विकासकाने ही इमारत बांधली आहे. ही इमारत गेल्या वर्षी पालिकेने धोकादायक घोषित केली होती. इमारतीच्या चौथ्या मजल्यावर एका कुटुंबीयांकडून घरातील देखभाल दुरुस्तीचे काम सुरू होते. अचानक या घरातील पृष्ठभागाचा स्लॅब कोसळून तो तिसर्‍या, दुसर्‍या आणि पहिल्या माळ्यावर कोसळत गेला. एकमेकांच्या भाराने हे स्लॅब कोसळले. स्लॅब खाली अडकून एकूण सहा जणांचा मृत्यू झाला. ही घटना पाहून कुटुंबीयांमधील सदस्यांनी बचावासाठी आरडाओरडा सुरू केला. इमारतीमधील इतर सदस्य आणि आजुबाजुचे रहिवासी बचावासाठी धावून आले. घरांमध्ये स्लॅब कोसळल्याने या घरांमध्ये प्रवेश कसा करायचा असा प्रश्न बचावासाठी धावलेल्या नागरिकांना पडला. ही माहिती तात्काळ पालिका अग्निशमन दलाला देण्यात आली.