ब्रेकिंग

महाराष्ट्र

उपमुख्यमंत्री अजित पवार यांच्या कार्यक्रमावेळी मधमाश्यांचा हल्ला

Samruddhi Dhayagude
29 Apr 2025

पोलिस कर्मचारी जखमी

रत्नागिरी : रत्नागिरी जिल्ह्याच्या संगमेश्वर दौर्‍यावर असलेल्या राज्याचे उपमुख्यमंत्री अजित पवार यांच्या ताफ्यावर मधमाश्यांनी अचानक हल्ला चढवला. उपमुख्यमंत्री अजित पवार यांना मधमाश्यांपासून वाचविण्यासाठी अनेक पोलीस कर्मचारी जखमी झाले, तर उपस्थित सर्वांचीच पळापळ झाली.

राज्याचे उपमुख्यमंत्री अजित पवार यांच्यासह महिला व बाल विकास मंत्री आदिती तटकरे, उद्योगमंत्री उदय सामंत तसेच स्थानिक आमदार संगमेश्वर कसबा येथे उभारण्यात येणार्‍या छत्रपती संभाजी महाराजांच्या स्मारकाच्या जागेच्या पहाणीसह आढावा बैठकीसाठी दौरा आयोजित करण्यात आला होता. या रत्नागिरी दौर्‍याच्या वेळी आढावा बैठकीत अधिकार्‍यांना सूचना दिल्यानंतर येथील जागेची पहाणी पवार यांच्या उपस्थितीत करण्यात आली. याचवेळी उपमुख्यमंत्री अजित पवार यांनी येथील सरदेसाई यांच्या वाड्याची पहाणी करण्यास सुरुवात केली असता, अचानक मधमाश्यांनी त्यांच्या ताफ्यावर हल्ला चढविला. यात अजित पवार यांना मधमाश्यांपासून वाचविताना अनेक पोलीस कर्मचारी जखमी झाले.

उपमुख्यमंत्री अजित पवार यांना सुरक्षित गाडीत बसविल्यानंतर सर्वांनी सुटकेचा निश्वास सोडला. मात्र या गोंधळात अधिकारी आणि पोलीस कर्मचार्‍यांना मधमाश्यांनी पाठलाग करत चावा घेतल्याने अनेक जण जखमी झाले. परभणी जिल्हा दौर्‍यातही शेतकर्‍यांनी अजित पवारांच्या ताफ्यावर चुना फेकून हल्ला करण्यात आला होता.