News - Daily Kesari

गुन्हेगारी जगत

बीडमध्ये सरपंचाची गुंडगिरी

Wrutuja pandharpure
26 May 2025

बीड : बीड जिल्ह्यातील वंजारवाडी गावचा सरपंच आणि त्याच्या सहकार्‍यांनी माजी सैनिकाच्या कुटुंबीयांना बेदम मारहाण केली. यात तीन महिला आणि दोन पुरूष जखमी झाले आहेत. जखमींमध्ये ७५ वर्षांच्या वृद्ध महिलेचाही समावेश आहे.वंजारवाडी गाव आदर्श म्हणून ओळखले जाते. याच गावात श्रमदारातून झाडे लावण्याचा उपक्रम हाती घेण्यात आला होता. या उपक्रमात माजी सैनिक विठ्ठल तांदळे यांचे कुटुंब सहभागी झाले नाही. दरम्यान, याचाच राग मनात सरपंच वैजनाथ तांदळे याच्यासह इतर सहा जणांनी या कुटुंबातील सदस्यांना मारहाण केली.

सुरूवातीला वैजनाथ आणि त्याच्या सहकार्‍यांनी विठ्ठल तांदळे यांच्या घरावर दगडफेक केली. या दगडफेकीत घराच्या काचा फुटल्या. तसेच घराबाहेरील वाहनांचे नुकसान झाले. त्यानंतर आरोपींनी थेट घरात घुसून कुटुंबातील सदस्यांवर हल्ला केला. ७५ वर्षांच्या वृद्ध महिलेलाही त्यांनी मारहाण केली. या मारहाणीत तीन महिला आणि दोन पुरुष गंभीर जखमी झाले. जखमी कुटुंबीयांनी शनिवारी रात्री उशिरा शासकीय रुग्णालयात उपचार घेतले. या घटनेनंतर पीडित कुटुंबाने पोलीस ठाणे गाठले. मात्र, पोलिसांनी गुन्हा दाखल करून घेतला नसल्याचे सांगण्यात येते.