News - Daily Kesari

महाराष्ट्र

विंझरमधील लोकांना ‘फिल्टर’चे पाणी

Wrutuja pandharpure
25 May 2025

जिल्ह्यातील पहिली ग्रामपंचायत

भोर : वेल्हे तालुक्यातील विंझर ग्रामपंचायतीने गावठाणासह चार वाडीवस्तीमधील लोकांसाठी ‘फिल्टर’व्दारे स्वच्छ व शुध्द पिण्याचे पाणी सशुल्क देण्याचा उपक्रम शंभर टक्के पूर्ण केला. अशा प्रकारे गावातील संपूर्ण लोकवस्तीला फिल्टरचे पाणी देणारी वेल्हे तालुक्यातील नव्हे तर जिल्ह्यातील पहिली ग्रामपंचायत असल्याचे सरपंच मोनाली लिम्हण यांचा दावा आहे.

इतकेच नाहीतर या वर्षी ऐन उन्हाळ्याच्या सुरवातीला एप्रिलमध्ये गावठाणातील लोकांना थंड पिण्याचे पाण्याची सोय केली आहे. त्यासाठी ग्रामपंचायतीने १५ व्या वित्त आयोगाच्या निधीतून सुमारे एक लाख रूपये खर्चून चिलर प्लांटची नव्याने उभारणी केली. त्यामध्ये एक हजार लीटरची टाकी बसवण्यात आली असून त्यातून २४ तास पाण्याची सोय केली आहे.

मागील वर्षी पुण्यातील रोटरी क्लबने स्वच्छ व शुध्द, निर्जतूंक पाण्याचा प्रकल्प ग्रामपंचायतीला बसवून दिला आहे. उर्वरित चार ठिकाणी ग्रामपंचायतीने विविध निधीतून फिल्टर बसवले. फिल्टरच्या पाण्याचा वापर सुरू झाल्या नंतर गावातील लोकांचे आजार क मी झाले असून पावसाळ्यातील साथीचे आजारांना पायबंद बसेल असे लिम्हण यांना विश्वास आहे. या उपक्रमासाठी गावातील निळूभाऊ भोसले, राजाभाऊ लिम्हण, विनायक लिम्हण, राहुल सागर,सचिन भोसले, तानाजी भोसले, शिवाजी लिम्हण आदींनी सहकार्य केले.

‘प्रिपेड एटीएम’ कार्ड

फिल्टर प्रयोग यशस्वी झाला आहे. त्यासाठी वीज बील व देखभालीचा खर्च आहे. त्यासाठी ग्रामपंचायतीने प्रिपेड पाण्याचे एटीएम कार्ड तार केली आहेत. ग्रामपंचायत पाचशे रूपये भरल्यानंतर हे कार्ड मिळते व रिचार्ज केले जाते. त्यासाठी प्रत्येक ठिकाणच्या मशिनवर स्कॅनर लावला आहे. स्कॅनरसमोर कार्ड धरण्यानंतर एका वेळी आठ लिटर पाणी संबधीतांना मिळते. पांचशे रूपयांचे रिचार्जमध्ये सरासरी तीन महीणे पुरेसे पाणी प्रत्येक कुटुंबाला मिळते. पैसे संपले की पुन्हा पैसे भरून कार्ड रिचार्ज करावे लागते.

सर्वांच्या सहकार्यातून गावातील बहुतेक सार्वजनिक व लोकोपयोगी कामे पूर्ण झाली आहेत.सर्व ठिकाणी फिल्टर बसवल्यामुळे लोकांचे आजार कमी झाले असून पावसाळ्यातील आजारांना पायबंद बसणार आहे.

- मोनाली लिम्हण, सरपंच, विंझर ग्रामपंचायत.