News - Daily Kesari

क्रीडा

हैदराबादचा संघर्षपुर्ण विजय

Vikrant kulkarni
24 May 2025

बंगळुरु : सन रायझर्स हैदराबाद आणि रॉयल चॅलेंजर्स बंगळुरु यांच्यात शुक्रवारी झालेल्या आयपीएलच्या सामन्यात हैदराबादचा मधल्या फळीतील अनुभवी फलंदाज इशान किशन याने शानदार अर्धशतक साकारत हैदराबादच्या संघाला २३१ धावा साकारून दिल्या. इशान किशन याने ४८ चेंडूत नाबाद ९४ धावा केल्या. त्याचे शतक अवघ्या ६ धावांनी हुकले. त्यामुळे हैदराबादच्या संघाने ४२ धावांनी हा सामना जिंकला.

त्याआधी बंगळुरुच्या संघाने नाणेफेक जिंकली आणो प्रथम गोलंदाजीचा निर्णय घेतला होता. त्यामुळे प्रथम फलंदाजी करणार्‍या हैदराबादच्या संघाने मात्र चांगली फलंदाजी केली. हैदराबादचा सलामीवीर अभिषेक शर्मा याने १७ चेंडूत ३४ धावा केल्या. लुंगी एन्गिडी याने शानदार गोलंदाजी करत फिल सॉल्टकडे अभिषेक शर्माला झेलबाद केले. त्याला साथ देणारा हेड याने १० चेंडूत १७ धावा केल्या. हेड याला भुवनेश्वरकुमार याने रोमारिओ शेफर्ड याच्याकडे झेलबाद केले.

त्यानंतर मधल्या फळीतील क्लासेन याला २४ धावांवर असताना सुयश शर्मा याने चकविणारा चेंडू टाकत रोमारिओ शेफर्ड याच्याकडे झेलबाद केले. अनिकेत वर्मा याने २६ धावा केल्या. नितीश रेड्डी ४ धावांवर रोमारिओ शेफर्ड याच्या गोलंदाजीवर कृणाल पांड्याकडे झेलबाद झाला. अभिनव मनोहर याने १२ धावा केल्या. रोमारिओ शेफर्ड याने त्याला देखील फिल सॉल्टकडे झेलबाद केले. कमिन्स १३ धावांवर नाबाद राहिला.

बंगळुरूच्या संघ मिळालेले २३२ धावांचे आव्हान पार करण्यासाठी मैदानात उतरला मात्र बंगळुरुला १९.५ षटकांत १८९/१० धावा करता आल्या. विराट कोहली ४३ धावा तर फिल सॉल्ट ६२ धावांवर बाद झाले. त्यानंतर बाकी फलंदाजांना म्हणावी तेवढी चांगली कामगिरी करता आली नाही.

संक्षिप्त धावफलक

हैदराबाद : इशान किशन नाबाद ९४, अभिषेक शर्मा ३४, हेड १७, क्लासेन २४, अनिकेत वर्मा २६, नितीश रेड्डी ४, अभिनव मनोहर १२, कमिन्स १३, एकूण : २० षटकांत २३१/६

बंगळुरु : फिल सॉल्ट ६२, कोहली ४३, मयांक अगरवाल ११, रजत पाटीदार १८, जितेश शर्मा २४, कृणाल पांड्या ८, डेविड १ एकूण १९.५ षटकांत १८९/१०