News - Daily Kesari

विदेश

पाकिस्तानातील ड्रोन हल्ल्यात कुटुंबातील चार मुलांचा मृत्यू

Samruddhi Dhayagude
21 May 2025

सुरक्षा दल, दहशतवाद्यांच्या संघर्षाचा फटका

पेशावर : पाकिस्तानातील खैबर पख्तुनख्वा प्रांतातील ड्रोन हल्ल्यात एकाच कुटुंबातील चार मुलांचा मृत्यू झाला असून पाच जण जखमी झाले आहेत. पाकिस्तानी लष्कराने दहशवाद्यांना लक्ष्य करण्यासाठी ड्रोन डागले होते. मात्र, नेम चुकून ते नागरी वस्तीवर पडले. त्यामुळे चार मुलांचा मृत्यू झाला आहे. त्यामुळे परिसरात संतापाची लाट उसळली असून नागरिकांनी आंदोलन केले.

उत्तर वझिरीस्थानातील मीर अली परिसरात सोमवारी सुरक्षा दल आणि दहशतवादी यांच्यात चकमक उडाली. एका ड्रोनने हुमजा गावातील एका घरावर बाँब टाकला. स्फोटात एकाच कुटुंबातील चार मुले ठार झाली असून पाच जण जखमी झाले. या घटनेमुळे परिसरात घबराट पसरली होती. स्थानिक नागरिकांनी मीर अली चौकात धरणे आंदोलन केले. दोषींना शिक्षा द्यावी आणि नागरिकांना न्याय द्यावा, अशी मागणी करणारे फलकही त्यांनी फडकावले. तसच ड्रोन हल्ल्याचा निषेध देत घोषणा दिल्या. सुरक्षा दल आणि बंदी घातलेली तेहरीक ए तालिबान पाकिस्तान दहशतवादी संघटना ड्रोनचा वापर एकमेकांवर करत आहेत. त्याचे दुष्परिणाम नागरिकांना भोगावे लागत आहेत.

खैबर पख्तुनख्वा प्रांताचे पुनर्वसन मंत्री हाजा नके महमद डवार यांनी घटनेची तीव्र शब्दांत निंदा केली आहे. नागरिकांना संघर्षाची झळ पोहोचता कामा नये, याबाबत मी नेहमीच आवाज उठविला आहे. मुले आणि महिला हल्ल्यांची शिकार होता कामा नयेत, या मताचा मी आहे, अशी पोस्ट देखील त्यांनी एक्सवर टाकली आहे.