News - Daily Kesari

विदेश

सौदी अरेबियासह पाच देशांतून पाकिस्तानी भिकार्‍यांची हकालपट्टी

Samruddhi Dhayagude
17 May 2025

रियाध : सौदी अरबसह पाच मुस्लिम राष्ट्रांनी पाकिस्तानी भिकार्‍यांची हकालपट्टी केली आहे. सौदी अरबने जानेवारी २०२४ पासून आतापर्यंत ५ हजार ३३ पाकिस्तानी भिकार्‍यांची हकालपट्टी केली आहे. पाकिस्तानी संसदेत गृहमंत्री मोहसीन नकवी यांनी ही माहिती दिली.

नकवी म्हणाले, पाकिस्तानातील अनेक गरीब नागरिक मलेशिया, इराक, संयुक्त अरब अमिरात, ओमान व कतारसारख्या देशात भीक मागण्यासाठी जातात. या नागरिकांना वाटते या देशांत भीक मागितल्यावर आपला उदरनिर्वाह होईल. तसेच आर्थिक परिस्थितीही सुधारेल. सौदी अरबला पाकिस्तानमधील शेकडो लोक भीक मागण्यासाठी जातात. कारण या देशांत मक्का व मदीना ही मुस्लिमांची सर्वात मोठी तीर्थक्षेत्रे आहेत. अनेक पाकिस्तानी भिकारी केवळ मक्का-मदीना परिसात भीक मागून श्रीमंत झाले आहेत. हे पाहून अलीकडच्या काळात पाकिस्तानमधील हजारो नागरिक भीक मागण्यासाठी सौदी अरबसह इतर मुस्लीम राष्ट्रांमध्ये जाऊ लागले आहेत.

सौदी अरब दरवर्षी हजारो पाकिस्तानी भिकार्‍यांना मायदेशी पाठवतो. त्यांनी पाकिस्तानी सरकारला बजावले होते होते की, तुमच्या देशातून भिकारी पाठवू नका. मात्र, तरीही पाकिस्तानने कोणतीही ठोस भूमिका या भिकार्‍यांबाबत घेतली नाही. सौदी अरब, इराक, मलेशिया, ओमान, कतारमधून मागील १६ महिन्यात ५ हजार ४०२ भिकार्‍यांना परत पाठवले आहे. गेल्या चार महिन्यांत या देशांनी ५५२ भिकारी परत आले आहेत.