ब्रेकिंग

देश

अलमट्टी धरणाची उंची वाढवण्यावर सरकार ठाम : शिवकुमार

Wrutuja pandharpure
25 May 2025

बंगळुरू : कोणत्याही राज्याने कितीही विरोध केला तरी अलमट्टी धरणाची उंची ५२४ मीटर करण्यावर कर्नाटक सरकार ठाम असल्याचे उपमुख्यमंत्री तथा जलसंपदा मंत्री डी. के. शिवकुमार यांनी सांगितले.

कोल्हार येथे विकासकामांच्या उद्घाटनप्रसंगी शिवकुमार बोलत होते. ते म्हणाले, बेळगाव, विजापूर, बागलकोट व रायचूर जिल्ह्यातील शेतकर्‍यांना जमिनीबरोबरच मोठ्या उद्योगधंद्यासाठी पाणीपुरवठा व्हावा, यासाठी अलमट्टी धरणाची उंची ५२४ मीटर करण्याचा सरकारचा प्रयत्न आहे. यासाठी लवकरच केंद्रीय जलसंपदा मंत्र्यांच्या उपस्थितीत महाराष्ट्र, कर्नाटक, तेलंगणा, आंध्र प्रदेश राज्यांची कृष्णा लवादाच्या पाणी वाटपाबाबत चर्चा करण्यात येणार आहे. त्यावेळी कर्नाटक सरकार केंद्र सरकारवर धरणाची उंची ५२४ मीटर करण्यासाठी दबाव टाकेल.

शेतकर्‍यांच्या दोन्ही हंगामांतील पिकाला पाणी देण्यासाठी सरकार प्रयत्नशील आहे. कृष्णा भाग जलनिगमच्या सर्व योजना पूर्ण करण्यासाठी कर्नाटक शासनाकडून सर्वच अंदाजपत्रकात कोट्यवधी रुपयांचे अनुदान ठेवण्यात आले आहे. भाजप सरकार योजना पूर्ण करण्यात अपयशी ठरल्यामुळे सत्ताधार्‍यांवर खोटे-नाटे आरोप करून जनतेची दिशाभूल करत आहेत. ते आरोप त्यांनी सिद्ध करून दाखवावेत, असेही शिवकुमार म्हणाले.