ब्रेकिंग

तुंबलेल्या नाल्यांची स्वच्छता करा, रस्त्यावरील खड्डे बुजवा

Wrutuja pandharpure
25 Jun 2025

पालिकेच्या जनसंवाद सभेत ५६ तक्रारी

पिंपरी : पिंपरी चिंचवड महापालिकेच्या वतीने सोमवारी पार पडलेल्या जनसंवाद सभेत एकूण ५६ तक्रारी प्राप्त झाल्या. तुंबलेल्या नाल्यांची स्वच्छता करावी, रस्त्यावरील खड्डे बुजवावेत अशी मागणी नागरिकांनी केली.नागरिक आणि प्रशासन यांच्यात सुसंवाद राखण्यासाठी आयुक्त तथा प्रशासक शेखर सिंह यांच्या आदेशानुसार सर्व क्षेत्रीय कार्यालयांत महिन्याच्या दुसर्‍या आणि चौथ्या सोमवारी जनसंवाद सभेचे आयोजन करण्यात येते. त्यानुषंगाने अ, ब, क, ड, इ, फ, ग आणि ह या आठ क्षेत्रीय कार्यालयात जनसंवाद सभा पार पडली. यावेळी जनसंवाद सभेचे अध्यक्षपद नेमून दिलेल्या समन्वय अधिकारी यांनी भूषविले.सोमवारी पार पडलेल्या जनसंवाद सभेत अ, ब, क, ड, इ, फ, ग आणि ह या क्षेत्रीय कार्यालयात अनुक्रमे ५, ७, ६, ६,२, १०, ४ आणि १६ अशा एकूण तक्रारी नागरिकांनी मांडल्या.

यावेळी नागरिकांनी पावसामुळे तुंबलेल्या नाल्यांची साफसफाई करावी, उघड्यावर कचरा टाकणार्‍यांवर कारवाई करावी, विविध ठिकाणी रस्त्यांवर पडलेले खड्डे बुजवावे, डासांचा प्रादुर्भाव वाढू नये याची काळजी घ्यावी, आवश्यक ठिकाणी किटकनाशक फवारणी करावी, मोकाट श्वानांचा बंदोबस्त करावा, रस्त्यांवरील अनधिकृत अतिक्रमणांवर कारवाई करावी, तुटलेल्या चेंबर्सच्या झाकणांची दुरूस्ती करावी अशा तक्रार वजा सूचना जनसंवाद सभेत नागरिकांनी उपस्थित राहून मांडल्या.