ब्रेकिंग

पुण्यात मुसळधार पावसाने मुठा नदी ओसंडून वाहू लागली

Samruddhi Dhayagude
19 Jun 2025

भिडे पूल पाण्याखाली, खडकवासल्यातून विसर्ग सुरु

पुणे : पुणे शहर आणि परिसरात गेल्या दोन दिवसांपासून संततधार पाऊस पडत आहे. काल रात्रीपासून पावसाची हजेरी कमी-अधिक प्रमाणात सुरूच आहे. पुण्याच्या मध्यवर्ती भागाबरोबरच, खडकवासला धरण क्षेत्र परिसर, सिंहगड रोड, धायरी, कात्रज, धनकवडी, आंबेगाव या उपनगरात पाणी साचल्याचे आढळले. काही भागात घरात पाणी शिरल्याच्या घटना समोर आल्या आहेत.

पुणे महापालिकेने खडकवासला धरणातून दुपारी १ वाजता सुमारे २ हजार क्युसेक पाण्याचा विसर्ग सुरु केला. नदीकाठच्या नागरिकांनी विशेष सतर्क राहावे. अनावश्यक प्रवास व नदीकाठी फिरणे टाळावे. कृपया नदीपात्रात उतरू नये. नदीपात्रात काही तत्सम साहित्य अथवा जनावरे असल्यास तात्काळ दुसरीकडे न्यावी.

कृपया सखल भागातील संबंधीत नागरीकांना सूचना देण्यात याव्या आणि उचित कार्यवाही करावी. सर्वांनी योग्य ती खबरदारी व दक्षता घ्यावी. असे महापालिकेकडून सांगण्यात आले. हवामान विभागाने दिलेल्या अंदाजानुसार, या आठवड्यात आकाश ढगाळ राहून हलका ते मध्यम स्वरूपाचा पाऊस पडण्याची शक्यता वर्तवण्यात आली होती. या रिपरिपीमुळे शहरातील प्रमुख रस्त्यांवरील वाहतूक संथ गतीने सुरू असल्याने प्रमुख मार्गांवर वाहतूक कोंडी झाल्याचे दिसले. त्यामुळे वाहनचालकांना मनस्ताप सहन करावा लागला.

भिडे पूल पाण्याखाली

दरवर्षीं जूननंतर पाण्याखाली जाणारा भिडे पूल यंदा लवकरच पाण्याखाली गेला आहे. संततधार पावसाने खडकवासला धरणाच्या पाणी पातळीत वाढ होऊ लागली. खबरदारी म्हणून महापलिकेने पाण्याचा विसर्ग सुरु केला आहे. त्यामुळे मुठा नदी ओसंडून वाहू लागली. यामुळे आता भिडे पूल पाण्याखाली गेल्याचे दिसते. भिडे पुलावरून सध्या वाहतूक बंद असल्याने काळजी करण्याचे कारण नाही.

यंदा धरणे लवकर भरणार

खडकवासला, पानशेत, टेमघर, वरसगाव या परिरसरातही मुसळधार पाऊस सुरु आहे. त्यामुळे दरवर्षी धरणं ही जुलै महिन्यानंतर किंवा ऑगस्ट महिन्यांत भरत असली तरी यंदा पावसाचे लवकर आगमन झाले. त्यामुळे धरणे लवकरच भरतील अशी आशा निर्माण झाली आहे. त्यामुळे पुणेकरांची वर्षभराच्या पाण्याची चिंता जुलै महिन्याच्या सुरुवातीलाच मिटेल, असा अंदाज आहे.