इराण - इस्रायल युद्धामुळे खाद्यतेलाचे दर वाढले   

डब्यामागे पन्नास ते साठ रुपयांनी वाढ

पुणे : इराण आणि इस्रायल यांच्यातील युद्धजन्य परिस्थितीचा फटका विविध प्रकारच्या खाद्यतेलाला बसला आहे. घाऊक बाजारांत सर्व प्रकारच्या तेलाचे दर किलोमागे तीन ते चार रुपयांनी, तर पंधरा लिटर आणि किलोच्या डब्याच्या दरात ५० ते ६० रुपयांनी वाढ झाली आहे. दोन्ही देशातील संघर्ष वाढत गेल्यास तेलाचे दर आणखी वाढण्याची शक्यता आहे. आंतरराष्ट्रीय बाजारांत तेलाचे दर वाढले असल्याची माहिती व्यापारी रायकुमार नहार यांनी दिली. 
 
नहार म्हणाले, इराण आणि इस्रायल यांच्यातील युद्धजन्य परिस्थितीमुळे तेलाच्या दरात अभूतपूर्व तेजी निर्माण झाली आहे. आयात शुल्क कमी झाल्यामुळे खाद्यतेलाचे दर काही प्रमाणात कमी झाले होते. मात्र, इराण-इस्रायल युद्धामुळे खनिज तेलाच्या किंमती वाढल्या आहेत. सरकी, पाम आणि सूर्यफूल तेलाच्या दरांत वाढ झाली आहे. कच्चा आयाती तेलावरील आयात शुल्क दहा टक्क्यांनी कमी केल्यामुळे सर्वच खाद्यतेलांच्या दरात घसरण झाली होती. सध्या तेलाची मागणी कमी आहे. मात्र, इराण-इस्रायल यांच्यातील संघर्षामुळे खनिज तेलाच्या किंमती बॅरलमागे सहा डॉलर्सनी वाढल्या आहेत. त्यामुळे आयाती खाद्यतेलांच्या किंमतीही वाढल्या आहेत. घाऊक बाजारात शेंगदाणा तेल वगळता अन्य सर्व खाद्यतेलांच्या दरात १५ किलो आणि लिटरच्या डब्यामागे ५० ते ६० रुपयांनी वाढ झाली आहे.
 
नारळाचे उत्पादन घटल्याने खोबरेल तेलाचेही दर वाढले आहेत. गोटा खोबर्‍याचे दर वाढल्यामुळे खोबरेल तेलाच्या २५ किलोच्या डब्याचा दर ६००० रुपयांवर पोहोचला आहे. दर उच्चांकी पातळीवर गेल्यामुळे सध्या बाजारात खोबरेल तेलाची आवक जवळपास थांबली आहे. मागणी अभावी वनस्पती तुपाच्या दरात ५० रुपयांनी घट झाली होती. मात्र, हे दर पुन्हा वाढले असल्याचेही रायकुमार नहार यांनी स्पष्ट केले. 
 
दर कमी होण्याची शक्यत कमीच 
 
इराण आणि इस्रायल यांच्यातील युद्धजन्य परिस्थितीमुळे खाद्यतेलाच्या दरांत मोठी वाढ झाली आहे. सर्व प्रकारच्या खाद्यतेलाच्या दरांत किलोमागे तीन ते चार रुपयांनी तसेच पंधरा किलो किंवा लिटरच्या डब्यामागे ५० ते ६० रुपयांनी वाढ झाली आहे. दोन्ही देशातील वाढता तणाव पाहता किंमती लवकर कमी होण्याची शक्यता नाही. 
 
- रायकुमार नहार, अध्यक्ष, दि पूना मर्चंट चेंबर.
 
घाऊक बाजारातील १५ किलो व लिटरच्या डब्याचे दर
 
तेल                                  दर
सोयाबीन तेल         १८६० ते २०६० रुपये
पाम तेल                १९३५ ते २१६० रुपये 
शेंगदाणा तेल          २२०० ते २४०० रुपये 
सूर्यफूल तेल १९८० ते २१३० रुपये 
सरकी तेल  १९५० ते २२०० रुपये 
वनस्पती तूप            १८५० ते २२०० रुपये 

Related Articles