श्री महागणपतीच्या दर्शनासाठी भाविकांची गर्दी   

रांजणगाव गणपती, (वार्ताहर) : अष्टविनायकापैकी एक असलेल्या श्री क्षेत्र रांजणगाव गणपती, ता. शिरुर येथील श्री महागणपतीच्या दर्शनासाठी संकष्टी चतुर्थी निमित्त भाविकांनी गर्दी केली होती.’गणपती बाप्पा मोरया,मंगलमूर्ती मोरया’ चा जयघोष करत भाविकांनी महागणपतीचे मनोभावे दर्शन घेतले.
 
संकष्टी चतुर्थीनिमित्त पहाटे ५ वाजता श्रींचा अभिषेक करून मंदिर भाविकांसाठी खुले करण्यात आले.  श्री क्षेत्र रांजणगाव गणपती देवस्थान ट्रस्टच्या वतीने आयोजित सामूहिक अथर्वशीर्ष पठण कार्यक्रमात महिला भगिनींसह भाविक सहभागी झाले होते. भाविकांसाठी सुलभ जलद दर्शन व्यवस्था, खिचडी प्रसाद व पिण्याचे पाणी इत्यादी सुविधा देवस्थान ट्रस्ट तर्फे देण्यात आल्या. शनिवारची सुट्टी आणि चतुर्थी यामुळे दर्शनासाठी भाविकांनी मोठी गर्दी केली होती. भाविकांच्या गर्दीने रांजणगाव अक्षरशः फुलून गेले होते.
 
दुपारी १२ वाजता देवस्थान ट्रस्ट मुख्यविश्वस्त ओमकार देव यांच्या हस्ते महापूजा व महानैवेद्य करण्यात आला. येथील गणेशभक्त व प्रगतशील शेतकरी नानासाहेब दिनकरराव पाचुंदकर यांच्या वतीने मंदिर गाभार्‍यात व परिसरात विविध रंगी फुलांची आकर्षक सजावट करण्यात आली. श्री महागणपती भजनी मंडळ यांचा भजनाचा कार्यक्रम झाला. यावेळी देवस्थानचे मुख्य विश्वस्त डॉ.ओमकार देव, उपाध्यक्ष  संदिप दौंडकर, सचिव डॉ.तुषार पाचुंदकर, खजिनदार विजय देव,राजमुद्रा पतसंस्थेचे अध्यक्ष दत्तात्रय पाचुंदकर,  व्यवस्थापक बाळासाहेब गोर्‍हे, पांडुरंग चोरगे, हिशोबणीस संतोष रणपिसे, देवस्थान कर्मचारी व भाविक उपस्थित होते.  दरम्यान, चतुर्थीनिमित्त रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे यांच्या नेतृत्वाखाली चोख पोलिस बंदोबस्त ठेवण्यात आला होता.

Related Articles