रांजणगाव गणपती, (वार्ताहर) : नंबर प्लेट नसलेली चारचाकी चालवून महामार्गावर  स्टंटबाजी करणार्‍या तरुणांच्या गाडीला अपघात झाल्याची धक्कादायक घटना पुणे-अहिल्यानगर महामार्गावर आज मंगळवार, दि.१०) दुपारी रांजणगाव एमआयडीसी हद्दीतील एलजी कंपनी समोर घडली आहे.दरम्यान, चारचाकी चालवताना स्टंटबाजी करणार्‍या तरुणांनी शिक्रापूर ते रांजणगाव गणपती दरम्यान पुणे अहिल्यानगर महामार्गावर प्रत्येक वाहनाला ओव्हरटेक करताना गाडी आडवी मारली.त्यामुळे महामार्गावर  काही काळ गोंधळाचे वातावरण निर्माण झाले होते. मळालेल्या माहितीनुसार, नंबर प्लेट नसलेल्या चारचाकीमध्ये तीन तरुण होते.त्यापैकी एकजण शिक्रापूर वरून शिरूरच्या दिशेने महामार्गावर स्टंटबाजी करत चारचाकी चालवत होता.यावेळी चारचाकी गाडीवरील ताबा सुटल्याने चारचाकी गाडी विरुद्ध बाजूला जाऊन एका इंडिका कारला धडकून, तीन-चार पलट्या घेऊन रस्त्याच्या बाजूला जाऊन आदळली. अपघातात चालक तरुण व इतर दोन तरुण किरकोळ जखमी झाले.यावेळी घटनास्थळी बघ्यांची मोठ्या संख्येने गर्दी झाली होती.या प्रकारामुळे नागरिकांमध्ये काही वेळ संताप निर्माण झाला होता.अशा स्टंटबाज मुलांच्यामुळे इतर प्रवाशांच्या जिवाला धोका निर्माण होत असल्याचे अनेक वाहनचालकांनी यावेळी सांगितले. तसेच स्टंटबाज तरुणांविरुद्ध वाहतूक कायद्याअंतर्गत कारवाई करण्यात यावी, अशी मागणी परिसरातील नागरिक, वाहनचालक आणि प्रवाशांनी केली आहे.