ब्रेकिंग

विदेश

तुर्कीच्या कट्टर शत्रूची भारत वाढविणार ताकद

Samruddhi Dhayagude
10 Jun 2025

नवी दिल्ली : भारताविरोधात लढाईत पाकिस्तानला मदत करून शस्त्र पुरवणार्‍या तुर्कीला आता मोठी किंमत मोजावी लागणार आहे. आता भारत तुर्कीचा विरोधक ग्रीसच्या सैन्याची ताकद वाढवणार आहे, असे भारतीय सैन्याचे माजी मेजर जनरल जीडी बख्शी यांनी स्पष्ट केले आहे. त्यांनी ग्रीससमोर ब्रह्मोस सुपरसोनिक क्रूज मिसाइल खरेदी करण्याचा प्रस्ताव ठेवला. तुर्कीचा कट्टर शत्रू ग्रीससोबत मैत्री आणि पूर्व मध्य सागरात भारताची हजेरी रेसेप तैय्यप एर्दोगनविरोधात नवे आव्हान निर्माण होऊ शकते, असे त्यांनी सांगितले.

ग्रीकमधील एका माध्यमाशी बोलताना जनरल जीडी बख्शी म्हणाले, ब्रह्मोस सुपरसोनिक मिसाईल, आकाश एअर डिफेन्स सिस्टम आणि पिनाका मिसाईल लॉन्चर ग्रीस भारताकडून खरेदी करू शकतो. त्याची युद्धात चाचणीही झाली आहे. संपूर्ण जगाने त्याची चांगली कामगिरी पाहिली आहे. ब्रह्मोस मिसाईलला अडवता येऊ शकत नाही, असे त्यांनी म्हटले आहे.

त्याशिवाय भारताने आठ टँक बनवले आहेत. ज्याला तोपखाना प्रणालीत विकसित केले आहेत. भारताचे हे शस्त्र तुर्कीला घाम फोडू शकते. जर तुर्कीचा ग्रीस अथवा सायप्रससोबत काही वाद झाला, तर भारतीय शस्त्रांच्या मदतीने हे देश तुर्कीला धूळ चारू शकतात, असा दावा जीडी बख्शी यांनी केला आहे. भारताने ग्रीस आणि सायप्रसला मदत करुन तुर्कीला डोळे वटारून दाखवले पाहिजे. ज्याप्रकारे तुर्कीने पाकिस्तानची मदत भारताविरोधात जाण्याची हिंमत केली त्याची किंमत त्याला चुकवावी लागेल असा इशाराही त्यांनी दिला.