ब्रेकिंग

क्रीडा

भारतीय संघाच्या घरच्या मैदानावरील मालिकांच्या वेळापत्रकात बदल

Samruddhi Dhayagude
10 Jun 2025

नवी दिल्ली : भारतीय संघ सध्या इंग्लंड दौर्‍यावर आहे. नवा कर्णधार शुबमन गिलच्या नेतृत्त्वाखाली भारतीय संघ इंग्लंडविरूद्ध पाच सामन्यांची कसोटी मालिका खेळणार आहे. या मालिकेदरम्यान सोमवारी भारतीय संघाच्या २ कसोटी सामन्यांच्या वेळापत्रकात बदल केला आहे. तर भारतीय महिला क्रिकेट संघाच्या एकदिवसीय मालिकेतील तीन सामन्यांचे ठिकाण देखील बदलण्यात आले.

नवीन वेळापत्रक जाहीर करताना बीसीसीआयने म्हटले आहे की, २ ऑक्टोबर २०२५ पासून वेस्ट इंडिजविरुद्ध सुरू होणार्‍या कसोटी मालिकेतील दुसरा सामना आता कोलकाताऐवजी दिल्लीतील अरुण जेटली स्टेडियमवर होईल. दक्षिण आफ्रिकेविरुद्धच्या कसोटी मालिकेतील पहिला सामना १४ नोव्हेंबरपासून सुरू होत आहे, जो आता दिल्लीऐवजी कोलकात्यातील ईडन गार्डन्सवर खेळवला जाईल.

बीसीसीआयने सांगितले की, भारत आणि ऑस्ट्रेलिया यांच्यातील एकदिवसीय मालिकेतील तिन्ही सामने आता चेन्नईमध्ये होणार नाहीत. या मालिकेतील दोन सामने आता न्यू चंदीगडमधील नवीन पीसीए स्टेडियममध्ये खेळवले जातील, तर शेवटचा एकदिवसीय सामना दिल्लीतील अरुण जेटली स्टेडियममध्ये होईल. चेपॉक स्टेडियमध्ये काम सुरू असल्याने ही मालिका आता तिथे होणार नाही.

ऑस्ट्रेलिया अ संघाचा पुरुष संघही भारत दौर्‍यावर येणार आहे. पहिला बहुदिवसीय सामना १६ सप्टेंबरपासून लखनौमध्ये होणार आहे. दुसरा सामना २३ सप्टेंबरपासून लखनौमध्ये होणार आहे. यानंतर ऑस्ट्रेलिया अ संघ कानपूरमध्ये भारत अ संघाविरुद्ध तीन सामन्यांची एकदिवसीय मालिका खेळेल.