ब्रेकिंग

पुण्यात जोरदार पाऊस

Wrutuja pandharpure
07 Jun 2025

पुणे : शहरासह उपनगरात पडलेल्या जोरदार पावसामुळे पुणेकरांची शुक्रवारी गैरसोय झाली. मध्यवस्तीतील विविध बाजारपेठेतील व्यवहार काही काळ विस्कळीत झाले. रस्त्यांवरून पाणी वाहत असल्याने वाहन चालकांसह पादचार्‍यांना आडोशाला थांबावे लागले. पाऊस थांबल्यानंतर रस्त्यावरील वाहत्या पाण्यामुळे वाहनांच्या लांबच लांब रांगा लागल्या होत्या.

शहरात सकाळपासून ढगाळ वातावरण होते. सुमारे ३.३० च्या दरम्यान जोरदार पावसाला सुरूवात झाली. त्यामुळे काही मिनिटांतच रस्त्यांवरून पाणी वाहण्यास सुरूवात झाली. पावसाच्या मार्‍यामुळे वाहन चालकांना वाहने कडेला लावून आडोशाला थांबावे लागले. महात्मा फुले मंडई, तुळशीबाग, लक्ष्मी रस्त्यावरील सराफी व कापड बाजार, बोहरीआळी, डेक्कन परिसरातील बाजारपेठेतील व्यवहार विस्ळकीत झाले. मध्य वस्तीतील बहुतांश रस्त्यांवरील वाहनांसह पादचार्‍यांची संख्या घटली. पावसामुळे अनेकांनी कार्यालयासह घराबाहेर पडणे टाळले. त्यामुळे रस्ते रिकामे

झाले होते.

पाऊस थांबल्यानंतर मात्र एकाच वेळी रस्त्यांवर वाहने आली त्यामुळे वाहतूक कोंडी झाली. चौकाचौकांतील वाहतूक कोंडी फोडण्यासाठी वाहतूक पोलिसांना तारेवरची कसरत करावी लागली. मध्य वस्तीतील लहान मोठ्या रस्त्यांवर वाहनांच्या रांगा लागल्या होत्या. रात्री उशीरापर्यंत रस्त्यांवर पाणी कायम होते. वाहत्या पाण्यात खड्ड्यांच्या अंदाज येत नसल्यामुळे वाहन चालकांना अंदाज घेत वाहन चालवावे लागत होते. त्यामुळे कार्यालये सुटल्यानंतर घराकडे निघालेल्या पुणेकरांना वाहतूक कोंडीमुळे उशीर झाला. पाऊस थांबल्यानंतरही ढगाळ वातावरण कायम होते. आज शहरात ढगाळ वातावरणासह पाऊस पडणार असल्याचा अंदाज हवामान विभागाने वर्तविला आहे.

दरम्यान, मान्सूनची उत्तर सीमा स्थिर आहे. दक्षिण मध्य महाराष्ट्रापासून उत्तर अंतर्गत कर्नाटकमार्गे तेलंगणा ओलांडून आंध्र प्रदेशच्या किनारपट्टीपर्यंत समुद्र सपाटीपासून दीड किलो मीटर उंचीवर एक द्रोणीका रेषा जात आहे. कोकण, गोव्यात आजपासून पुढील सहा दिवस काही ठिकाणी, मध्य महाराष्ट्रात तीन दिवस काही ठिकाणी, मराठवाड्यात काही ठिकाणी, विदर्भात पुढील चार दिवस काही ठिकाणी मेघगर्जना व वीजांच्या कडकडाट पाऊस पडणार असल्याचा अंदाज आहे. पुढील २४ तासात कोकण, गोवा, मध्य महाराष्ट्र व मराठवाड्यात तपमानात मोठा बदल होणार नाही. त्यानंतर तपमानात २ ते ३ अंशाने वाढ होणार असल्याचा अंदाज आहे. विदर्भात पुढील चार दिवसांनंतर ४ ते ५ अंशाने तपमानात वाढ होणार आहे. राज्यात आज बहुतांश ठिकाणी मेघगर्जना व वीजांच्या कडकडाट आणि वादळी वार्‍यासह जोरदार ते मध्यम स्वरूपाचा पाऊस पडणार असल्याचा अंदाज आहे.

शहरात पडलेला पाऊस

ठिकाण पाऊस

लोहगाव ३९.८ मिमी

पाषाण १९.८ मिमी

शिवाजीनगर १५.२ मिमी

एनडीए ७.५ मिमी

धरण क्षेत्रात पडलेला पाऊस

धरण पाऊस टीएमसी टक्केवारी

खडकवासला ३ मिमी ०.७८ ३९.२९

पानशेत १९ मिमी १.७५ १६.४२

वरसगाव १७ मिमी २.७६ २१.५६

टेमघर ०० मिमी ०.१८ ४.८०