ब्रेकिंग

विदेश

सिंध प्रांतात हिंदू धर्मीयांची निदर्शने

Samruddhi Dhayagude
03 Jun 2025

शिव मंदिराची जमीन बळकावल्याचा निषेध

हैदराबाद : पाकिस्तानातील सिंध प्रांतातील एका ऐतिहासिक शिव मंदिराची जमीन बांधकाम व्यावसायिकांनी बेकायदा बळकावली. त्यामुळे संतप्त झालेल्या हिंदू धर्मीय नागरिकांनी जोरदार निदर्शने केली. बेकायदा बांधकाम तातडीने पाडून न्याय द्यावा, अशी मागणी त्यांनी केली. सिंध प्रांतातील मुसा खटियान जिल्ह्यातील टांडो जाम शहरात निदर्शने करण्यात आली. कराचीपासून हा जिल्हा सुमारे १८५ किलोमीटरवर आहे. हिंदू धर्मीय नेते सीटाल मेघवाड यांनी सांगितले की, पुरातन शिव मंदिराची समारे सहा एकर जागा बळकावण्यात आली असून तेथे बेकायदा बांधकाम करण्यास सुरुवात झाली होती.त्यामुळे त्याविरोधात आम्ही निदर्शने करुन आवाज उठविला आहे. त्यात महिला आणि मुलेही सहभागी झाली होती. पाकिस्तान दलित इत्तेहाद (पाकिस्तान द्रविड अलायन्स) संघटनेच्या आवाहनानुसार नागरिक आले आणि त्यांनी न्यायाच्या मागणीसाठी निदर्शने केली. संघटना हिंदू धर्मीय नागरिकांच्या हक्कासाठी गेली अनेक दशके लढा देत आली आहे.

मंदिरे आमची श्रद्धास्थाने आहेत. मात्र, बिल्डरांनी मंदिराची जमीन बळकावून तेथे बेकायदा बांधकाम सुरू केले आहे. जमीन त्यांनी लुबाडली आहे. केवळ मंदिराची जमीन नाही तर स्मशानभूमी देखील लाटली आहे, असे नेते राम सुंदर यांनी सांगितले. सरकारने बिल्डरांवर तातडीने कारवाई करावी. संबधित बिल्डरांवर काशखेल समुदायाचा प्रभाव असल्याचा आरोपही नागरिकांनी केला त्यांनी टांडो जाम प्रेस क्लबसह विविध ठिकाणी धरणे धरले होते. शिव मंदिराकडे जाणारे मार्गही रोखले होते. या प्रकरणी पोलिस आणि संबधितांकडे तक्रारी केल्या. मात्र, कोणतीही दखल घेतली नाही. बेकायदा बांधकाम हटवले गेलेले नाही, असा आरोप नेते शिव काची यांनी केला. अशा प्रकारचा आरोप निदर्शने करणार्‍या हिंदू धर्मीय नागरिकांनी केला आहे.