ब्रेकिंग

विदेश

संयुक्त राष्ट्रांच्या शांतता मोहिमेसाठी बीएसएफची तुकडी काँगोला रवाना

Samruddhi Dhayagude
03 Jun 2025

नवी दिल्ली : संयुक्त राष्ट्रांच्या शांतता मोहिमेसाठी सीमा सुरक्षा दलाची १६० सदस्यांची तुकडी काँगोला रवाना झाली. या तुकडीमध्ये २५ महिला सदस्य आहेत. बीएसएफचे महासंचालक दलजित सिंग चौधरी यांनी लोधी रस्ता येथील सुरक्षा दलाच्या मुख्यालयात त्यांची भेट घेतली. त्यावेळी चौधरी म्हणाले, अलिकडच्या ऑपरेशन सिंदूर दरम्यान झालेल्या कारवाईमुळे बीएसएफला एक अद्वितीय ओळख मिळाली आहे. या तुकडीचे वर्तन आणि काम अनुकरणीय असले पाहिजे. तुम्हाला या कामासाठी प्रशिक्षित केले गेले आहे. मला खात्री आहे की, तुम्ही देशाचा आणि सैन्याचा ध्वज उंच फडकवाल.

कमांडंट कैलाश सिंग मेहता यांच्या नेतृत्वाखाली बीएसएफची ही १८ वी तुकडी काँगोच्या लोकशाही प्रजासत्ताकातील बेनी येथे असलेल्या संयुक्त राष्ट्र संघटना स्थिरीकरण मोहिमेत सामील होईल. १६० सदस्यांच्या तुकडीत सात अधिकारी, नऊ अधीनस्थ अधिकारी आणि १४४ इतर कर्मचारी आहेत, ज्यात एक महिला वैद्यकीय अधिकारी आणि २४ महिला कॉन्स्टेबल आहेत. या तुकडीला ११ आठवड्यांचे तैनातीपूर्व प्रशिक्षण देण्यात आले आहे. दरम्यान, काँगो हा युगांडा, रवांडा आणि बुरुंडीच्या सीमेवर आहे. अंतर्गत अशांततेमुळे काँगो संयुक्त राष्ट्रांच्या नियंत्रणाखाली आहे.