ब्रेकिंग

गुन्हेगारी जगत

डिजीटल अ‍ॅरेस्टची भिती दाखवून ज्येष्ठाची फसवणूक करणार्‍यास अटक

Wrutuja pandharpure
03 Jun 2025

पुणे : मनी लाँड्रींगच्या प्रकरणात डिजीटल अ‍ॅरेस्टची भिती दाखवून ज्येष्ठ नागरिकाची सहा कोटी २९ लाखांची फसवणूक करणार्‍या आरोपीला सायबर पोलिसांच्या पथकाने पनवेल येथून अटक केली. सायबर पोलिसांच्या पथकाने सापळा रचून ही कारवाई केली. तुषार हरिश्चंद्र वाजंत्री (वय २८, कोकबन, ता. रोहा, रायगड) असे अटक करण्यात आलेल्या आरोपीचे नाव आहे.

आरोपी वाजंत्री याने पुण्यातील एका ज्येष्ठ नागरिकाला ९ ते १९ नोव्हेंबर २०२४ दरम्यान अनोळखी व्हॉट्सअ‍ॅप क्रमांकावरून फोन करून पोलीस असल्याची बतावणी केली. तसेच, त्यांचा विश्वास संपादन करून त्यांच्याविरोधात मनी लाँड्रिंगची केस असल्याचे सांगितले. तसेच, चौकशीच्या बहाण्याने डिजिटल अरेस्ट करून ज्येष्ठ नागरिकाला पैसे पाठविण्यास सांगितले. ज्येष्ठाने वाजंत्री याच्या खात्यावर वेळोवेळी तब्बल सहा कोटी २९ लाख रुपये पाठविले. मात्र, आपली फसवणूक झाल्याचे लक्षात आल्यावर ज्येष्ठाने सायबर पोलीस ठाण्यात तक्रार दिली. त्यावरून गुन्हा दाखल करण्यात आला होता. गुन्हा दाखल होताच, सायबर पोलिसांकडून आरोपीच्या बँक खात्याचा तपास सुरू होता. त्यावेळी, ११ नोव्हेंबर २०२४ रोजी २० लाखांची रक्कम तक्रारदार यांच्या खात्यातून आरोपीच्या खात्यात वर्ग झाल्याचे उघडकीस आले. त्यानंतर आरोपीने ९० लाख आणि २० लाख रुपयांची मुदत ठेव (एफडी) केली. हे बँक खाते कोकबन येथील धावीर कन्स्ट्रक्शन यांचे असल्याचे उघड झाले.