ब्रेकिंग

विदेश

अमेरिकेकडून स्टील आणि अ‍ॅल्युमिनियमवरील आयात कर दुप्पट

Samruddhi Dhayagude
02 Jun 2025

वॉशिंग्टन : अमेरिकेचे अध्यक्ष डोनाल्ड ट्रम्प यांनी स्टील आणि अ‍ॅल्युमिनियमच्या आयातीवरील सध्याचा आयात कर २५ वरून ५० टक्क्यांपर्यंत वाढवल्याची घोषणा केली आहे. आयातीवरील कर वाढवल्याने भारतीय धातू निर्यातीवर ४.५६ अब्ज डॉलर्स किंवा ३९ हजार कोटी रुपयांचा परिणाम होण्याची शक्यता आहे.

पेनसिल्व्हेनियातील पिर्ट्सबर्ग येथे एका सभेत बोलताना ट्रम्प म्हणाले, या निर्णयामुळे स्थानिक स्टील उद्योग आणि राष्ट्रीय पुरवठा वाढण्यास मदत होईल. तसेच चीनवरील अवलंबित्व कमी होईल. अमेरिकन स्टील आणि जपानच्या निप्पॉन स्टील यांच्यातील भागीदारीद्वारे या क्षेत्रातील स्टील उत्पादनात १४ अब्ज डॉलर्सची गुंतवणूक केली जाईल.

४ जूनपासून लागू होणार्‍या उच्च शुल्कांमुळे अमेरिकन बाजारपेठेतील भारतीय उत्पादक आणि निर्यातदारांसाठी उत्पादन खर्च वाढण्याची अपेक्षा आहे, त्यामुळे त्यांच्या स्पर्धात्मकतेवर परिणाम होऊ शकतो. भारताच्या धातू क्षेत्रासाठी अमेरिका ही एक महत्त्वाची बाजारपेठ आहे. आर्थिक वर्ष २०२५ मध्ये भारताने अमेरिकेला ४.५६ अब्ज डॉलर्स किमतीचे लोखंड, पोलाद आणि अ‍ॅल्युमिनियम उत्पादने निर्यात केली. २०२५ च्या निर्यातीत ५८७.५ दशलक्ष डॉलर्स किमतीचे लोखंड आणि पोलाद, ३.१ अब्ज डॉलर्स किमतीचे लोखंड आणि पोलाद उत्पादने तसेच ८६० दशलक्ष डॉलर्स किमतीचे अ‍ॅल्युमिनियम आणि संबंधित वस्तूंचा समावेश होता. त्यामुळे या करवाढीचा फटका भारतालाही मोठ्या प्रमाणावर बसणार आहे.

दरम्यान, या करवाढीमुळे अमेरिकन स्टीलच्या किमती प्रति टन १ हजार १८० किंवा १ लाख रुपयांच्या वर जाऊ शकतात. ट्रम्प यांनी २०१८ मध्ये पहिल्यांदा ही तरतूद लागू केली होती. स्टीलवर २५ आणि अ‍ॅल्युमिनियमवर १० टक्के कर लादला. फेब्रुवारी २०२५ मध्ये या दरांमध्ये सुधारणा करण्यात आली.