ब्रेकिंग

महाराष्ट्र

संतोष देशमुख प्रकरणाची पुनरावृत्ती थोडक्यात टळली!

Wrutuja pandharpure
18 May 2025

परळीत तरूणाला दहा ते बारा जणांकडून बेदम मारहाण

बीड : बीड जिल्ह्यातील परळी येथे संतोष देशमुख प्रकरणाची पुनरावृत्ती शुक्रवारी थोडक्यात टळली. शिवराज दिवटे या तरूणाला दहा ते बारा जणांच्या टोळक्याने लोखंडी रॉड आणि बांबूने बेदम मारहाण करून गंभीर जखमी केले. दिवटे याला झालेल्या मारहाणीची चित्रफीत समाजमाध्यमावर प्रसारीत झाली आहे.

शुक्रवारी संध्याकाळी दहा ते बारा जणांनी दिवटे याचे अपहरण करुन त्याला डोंगरभागात नेले. तिथे त्याला बांबू आणि लाकडाने बेदम मारहाण केली. यात दिवटे गंभीर जखमी झाला असून, त्याच्यावर रूग्णालयात उपचार सुरू आहेत. मारहाण करताना आरोपी ’तुला सोडणार नाही, तुझा संतोष देशमुख पार्ट टू करू’ असे धमकावत असल्याचा दावा त्याने केला आहे.

दरम्यान, बीडचे पोलिस अधिक्षक नवनीत काँवत यांनी सात आरोपींना अटक केली असून, ते विविध जातीचे असल्याचे सांगितले आहे. दोन आरोपी अल्पवयीन असून या घटनेला जातीय वळण न देण्याचे आवाहन त्यांनी केले आहे. किरकोळ भांडणातून झालेला हा प्रकार आहे. मात्र, विषय गंभीर असल्याने आरोपींवर कठोर कलमे लावण्यात आल्याचे काँवत यांनी सांगितले.