ब्रेकिंग

गुन्हेगारी जगत

IRS अधिकाऱ्याच्या घरावर धाड,एक कोटींची रोकड, ३.५ किलो सोने जप्त

Samruddhi Dhayagude
03 Jun 2025

चंदिगढ : सीबीआयने आयआरएसचे वरिष्ठ प्राप्तिकर अधिकारी अमित कुमार सिंघल यांच्या घरावर आणि त्यांच्याशी संबधित ठिकाणांवर एकाचवेळी छापे टाकले. सीबीआयच्या हाती एक कोटी रुपयांची रोकड आणि साडे तीन किलो सोने सापडले. सीबीआयने सिंघल आणि त्यांच्या एका साथीदाराला अटक केली आहे. ही कारवाई लाचखोरीच्या आरोपात केलेली आहे.

२००७ च्या बॅचचे आयआरएस अधिकारी सिंघल आणि त्यांचा सहकारी हर्ष कोटक यांच्याशी संबंधित ठिकाणांवर सीबीआयने एकाचवेळी धाडी टाकल्या. करदाता सेवा संचलनालयात अतिरिक्त महासंचालक पदावर सिंघल कार्यरत होते. दिल्ली आणि पंजाबमधील सिंघल यांच्या घरांवर सीबीआयने छापे टाकले. या कारवाईत १ कोटी रोकड, ३.५ किलो सोनं आणि २ किलो चांदी जप्त करण्यात आली. मुंबई, दिल्ली, पंजाबच्या लुधियाना, मोहाली, भटिंडा, जिरकपूर आणि न्यू चंदिगढमध्ये सिंघल यांच्या मालकीच्या अनेक मालमत्ता आहेत.

'ला पिनोज पिझ्झा'चे मालक सनम कपूर यांनी सिंघल यांच्याविरोधात तक्रार दिली होती. २५ लाख रुपयांची लाच घेतल्याप्रकरणी सिंघल यांना अटक झाली. कपूर यांना प्राप्तिकर विभागानं नोटीस पाठवली होती. या प्रकरणात तडजोड करण्यासाठी सिंघल यांनी कपूर यांच्याकडे एकूण ४५ लाख रुपयांची लाच मागितली होती.

४५ लाख रुपयांपैकी आधीचे २५ लाख रुपये देण्यासाठी कपूर सिंघल यांच्या मोहालीतील घरी पोहोचले. हर्ष कोटक नावाच्या व्यावसायिकाने सिंघल यांच्या वतीने लाच स्वीकारली. यावेळी कपूर यांच्या तक्रारीवरुन सीबीआयच्या एका पथकाने परिसरात छापा टाकला आणि कोटकला अटक केली. अमित सिंघल यांची २५ बँक खाती आहेत. बँकेत त्यांच्या नावे एक लॉकरदेखील आहे. त्यांच्या घरातून मालमत्तांची कागदपत्रे जप्त केली आहेत. त्यांच्याविरोधात डिजिटल पुरावेदेखील सापडले आहेत.

यानंतर सीबीआयच्या दुसऱ्या पथकाने सिंघल यांनी त्याच दिवशी बेड्या ठोकल्या. दिल्लीतील निवासस्थानावरुन त्यांना अटक करण्यात आली. यानंतर दोघांना चंदिगढमधील एका विशेष न्यायदंडाधिकाऱ्यांसमोर हजर केले. न्यायालयाने त्यांना १३ जूनपर्यंत न्यायालयीन कोठडी सुनावली.