ब्रेकिंग

शैक्षणिक

सीए अभ्यासक्रमाचे सुधारित वेळापत्रक जाहीर

Wrutuja pandharpure
13 May 2025

पुणे : भारत-पाकिस्तान युद्धजन्य परिस्थितीमुळे व सुरक्षिततेच्या दृष्टीने चार्टर्ड अकाउंटंट (सीए) परीक्षा पुढे ढकलण्यात आली होती. त्यामुळे आता ही परीक्षा कधी होणार आहे, याकडे सर्वांचे लक्ष होते. अखेर इन्स्टिट्यूट ऑफ चार्टर्ड अकाउंटंट्स ऑफ इंडियाने (आयसीएआय) सीए अभ्यासक्रमांचे सुधारित वेळापत्रक जाहीर केले आहे. ही पुढील परीक्षा १६ ते २४ मे या कालावधीत पार पडणार आहेत. सीए अंतिम, इंटरमीडिएट आणि आयएनटीटी-एटी (पीक्यूसी) या तीनही स्तरांच्या परीक्षांचा यात समावेश आहे. युद्धविरामानंतर या सुधारित तारखा निश्चित करण्यात आल्याचे आयसीएआयने स्पष्ट केले आहे. याआधी सीए परीक्षा ९ ते १४ मे दरम्यान घेतल्या जाणार होत्या.

परीक्षेच्या वेळा आणि केंद्रे आधीप्रमाणेच राहणार आहेत, त्यात कोणताही बदल होणार नाही. या परीक्षा त्यांच्या नियुक्त केंद्रांवर दुपारी २ ते ५ आणि ६ या वेळेत घेतल्या जातील. याशिवाय मे सत्रासाठी सीए फाउंडेशनच्या परीक्षा १५, १७, १९ आणि २१ मे रोजी नियोजित वेळापत्रकानुसार घेतल्या जाणार आहेत. सविस्तर माहिती आयसीएआयच्या अधिकृत संकेतस्थळावर उपलब्ध असल्याचे आयसीएआयने सांगितले आहे.