ब्रेकिंग

महाराष्ट्र

आईला रुग्णालयात दाखल करून पुत्र देशासाठी सीमेवर रवाना

Wrutuja pandharpure
11 May 2025

भिमाशंकर, (वार्ताहर) : आईला उपचारासाठी नारायणगाव येथील सर्पदंश व विषबाधा तज्ञ डॉ. सदानंद राऊत यांच्या दवाखान्यात दाखल करून सीआरपीएफ मध्ये येथे कार्यरत असलेले जवान बापू सिताराम भोईर हे देश सेवेसाठी रणभूमीकडे रवाना झाले आहेत.

आंबेगाव तालुक्याच्या पश्चिम आदिवासी भागातील निगडाळे येथील बापू भोईर हे राष्ट्रीय रिझर्व पोलिस फोर्स (सीआरपीएफ) मध्ये कॉन्स्टेबल या पदावर कार्यरत आहेत. त्रिपुरा, श्रीनगर भागात त्यांनी १३ वर्षे देश सेवा केली आहे. सध्या ते पहलगाम येथे कार्यरत आहेत. एक वर्षाच्या प्रतीक्षेनंतर एक महिन्याची सुट्टी काढून २९ एप्रिल रोजी ते गावी आले होते. २ मे रोजी भात खाचराची भाजणी करत असताना दुपारी साडे अकराच्या दरम्यान त्यांची आई पार्वताबाई भोईर (वय ६०) यांना सर्पाचा पायाला दंश झाला. त्यांना उपचारासाठी मंचर येथील उपजिल्हा रुग्णालयात दाखल करण्यात आले. उपचार सुरू असताना अत्यवस्थ झाल्यामुळे त्यांना सर्पदंश व विषबाधा तज्ञ डॉ. सदानंद राऊत यांच्या रुग्णालयात दाखल करण्यात आले.आईची देखभाल करत असतानाच भारत पाकिस्तान युध्दाच्या पार्श्वभूमीवर त्यांची रजा रद्द करण्यात आली. त्यांना त्वरीत पहलगाम भागातील कुलग्राम येथे देश सेवेसाठी हजर राहण्याचे आदेश गुरुवारी आले होते.