News - Daily Kesari

क्रीडा

निकोलस पूरन मुंबई इंडियन्सच्या कर्णधारपदी

Samruddhi Dhayagude
12 Jun 2025

न्यूयॉर्क : वेस्ट इंडिजचा आक्रमक फलंदाज निकोलस पूरनने आंतरराष्ट्रीय क्रिकेटमधून निवृत्ती घेतली आणि दुसर्‍याच दिवशी त्याच्यावर एक मोठी जबाबदारी सोपावण्यात आली. मुंबई इंडियन्स फ्रँचायझीने निकोलस पूरनला एमआय न्यूयॉर्क संघाचा कर्णधार म्हणून नियुक्त केले आहे.निकोलस पूरनने १० जून रोजी आंतरराष्ट्रीय क्रिकेटमधून निवृत्तीची घोषणा केली. त्याच्या दुसर्‍याच दिवशी मुंबई इंडियन्सने त्याच्यावर विश्वास दाखवत त्याच्याकडे एमआय न्यूयॉर्क संघाचे नेतृत्व सोपवले आहे. गेल्या हंगामात या संघाचे नेतृत्व केरॉन पोलार्डकडे होते आणि त्याच्या नेतृत्वाखाली एमआय न्यूयॉर्कने मेजर लीग क्रिकेटचे जेतेपद जिंकले होते.

आयपीएल २०२५ मध्ये, मुंबई इंडियन्स त्यांचे सहावे विजेतेपद जिंकू शकले नाही. संघाला एलिमिनेटर सामन्यात पराभवाचा सामना करावा लागला. त्यानंतर आता फ्रँचायझीने दुसर्‍या लीगसाठी मोठे पाऊल उचलले आहे. निकोलस पूरनकडे मोठी जबाबदारी सोपावण्यात आली. आयपीएल २०२५ मध्ये निकोलस पूरनने लखनऊ सुपर जायंट्ससाठी ५२४ धावा केल्या.

त्यामध्ये ५ अर्धशतकांचा समावेश होता. या स्पर्धेमध्ये पूरनचा स्ट्राइक रेट १९६.२५ इतका होता. लखनऊ सुपर जायंट्सने निकोलस पूरनवर २१ कोटींची बोली लावली होती. पूरनने त्याच्यावरील विश्वास सार्थ ठरवला. एकूण ९ वर्षांच्या आंतरराष्ट्रीय कारकिर्दीत पूरनने ६१ वनडे आणि १०६ टी २० सामने खेळले. वनडे धावा: १९८३ (३ शतकं, ११ अर्धशतकं) टी २० धावा: २२७५ (१३ अर्धशतकं)