News - Daily Kesari

देश

मध्य प्रदेशात भीषण अपघातात ९ ठार; दोन जखमी

Samruddhi Dhayagude
05 Jun 2025

झाबुआ, (मध्य प्रदेश) : मध्य प्रदेशातील झाबुआ जिल्ह्यात बुधवारी पहाटे सिमेंटने भरलेली मालमोटार भीषण अपघातानंतर एका मोटारीवर उलटली. या अपघातात नऊ जणांचा मृत्यू झाला. तर, दोन जण जखमी झाले, अशी माहिती पोलिस अधिकार्‍यांनी सांगितली.

बुधवारी पहाटे अडीचच्या सुमारास हा अपघात झाला. मृतांमध्ये पाच अल्पवयीन मुलांचा समावेश आहे. ते सर्व जण एका लग्नसमारंभातून मोटारीने परत येत होते. मेघनगर तालुक्यातील संजेली येथील रेल्वे क्रॉसिंगजवळील भरधाव वेगातील मालमोटारीने एका मोटारीला धडक दिली. त्यानंतर, नियंत्रण सुटल्याने मालमोटार अन्य मोटारवर उलटली. यात दोन कुटुंबातील नऊ जणांचा जागीच मृत्यू झाला, असे झाबुआचे पोलिस अधीक्षक पद्मविलोचन शुक्ला यांनी सांगितले. ते सर्व जण शिवगड महुदा गावाचे रहिवासी होते. मुकेश खापेड (४०), सावली खापेड (३५), विनोद खापेड (१६), पायल खापेड (१२), मधी बामनिया (३८), विजय बामनिया (१४), कांता बामनिया (१४), रागिनी (९) आणि अकली परमार (३५) अशी मृतांची नावे आहेत. मृतदेह शवविच्छेदनासाठी पाठवण्यात आले आहेत. तर, जखमींवर रुग्णालयात उपचार सुरू आहेत. अपघातानंतर मालमोटारचालक पसार झाला, असेही अधिकार्‍यांनी सांगितले.