News - Daily Kesari

गुन्हेगारी जगत

मुलांना मद्य देणारे बार पोलिसांकडून सील

Wrutuja pandharpure
31 May 2025

पुणे : सिंहगड रस्त्यावरील हिंगणे खुर्द परिसरात अल्पवयीन मुलांनी दारूच्या नशेत वाहनांची तोडफोड करून दहशत माजवण्याचा प्रयत्न केला होता. याप्रकऱणी सिंहगड पोलिसांनी अल्पवयीन मुलांना दारू विक्री करणार्‍या बारवर कारवाई करून ते सील केल आहेत. तसेच, बारमालक, व्यवस्थापक, बार काउंटर आणि दारू देणार्‍यासह त्या अल्पवयीन मुलांच्या पालकांना गुन्ह्यात सहआरोपी केले आहे.

हिंगणे खुर्द येथील तुकाईनगर परिसरात दोन अल्पवयीन मुलांसह टोळक्याने ’आम्हीच इथले भाई आहोत’, असे म्हणत दहशत माजवण्याचा प्रयत्न केला. त्यानंतर, रस्त्याच्या कडेला लावलेल्या २० ते २२ वाहनांची तोडफोड केली होती. या मुलांनी एका तरुणावर कोयत्याने हल्ला करून त्याला जखमी केले होते. सिंहगड पोलिसांनी याप्रकऱणी काही अल्पवयीन मुलांना ताब्यात घेतले होते. तर, त्यांचा साथीदार साई पांडुरंग उमाप (वय १८, समर्थनगर) याला अटक केली होती.

पोलिसांनी गुन्ह्याचा सखोल तपास केल्यानंतर चौघे जण दारू प्यायले असल्याचे समोर आले होते. चौकशीत या तिघांनी वडगाव बुद्रुक येथील हॉटेल नशा बारमधून दारू घेतली आणि ती पिल्यानंतर, दहशत माजवून वाहनांची तोडफोड केल्याचे समोर आले. त्यावरून, पोलिसांनी सीसीटीव्ही व इतर माहितीवरून चौकशी केल्यानंतर, बार मालकांसह व्यवस्थापक व दारू देणार्‍यांना या गुन्ह्यात आरोपी केले. पोलिसांनी व्यवस्थापकासह दारू देणारा व बार काउंटर यांना अटक केली, तर बार मालक पसार झाला आहे. पोलिस उपनिरीक्षक सुरेश जायभाय याप्रकरणी अधिक तपास करत आहेत.