News - Daily Kesari

विदेश

युनूस यांनी अमेरिकेला देश विकला

Wrutuja pandharpure
26 May 2025

माजी पंतप्रधान शेख हसीना यांचा घणाघात

नवी दिल्ली : महमद युनूस यांच्या हंगामी सरकारने बांगलादेश अमेरिकेला विकला आहे, असा घणाघात माजी पंतप्रधान शेख हसीना यांनी केला आहे. माध्यमांना दिलेल्या मुलाखतीत हसीना म्हणाल्या, जेव्हा अमेरिकेला सेंट मार्टिन बेट हवे होते, तेव्हा माझे वडील ते देण्यास सहमत नव्हते. यात त्यांना आपला प्राण गमवावा लागला; परंतु सत्तेत राहण्यासाठी देश विकण्याचा विचार त्यांच्या मनात देखील कधी आला नाही! शेख मुजीबुर रहमान यांच्या आवाहनाला जनतेने प्रतिसाद दिला, शस्त्रे उचलली आणि ते लढले. ३० लाख नागरिकांना मुक्त करण्यासाठी त्यांनी आपले प्राण दिले. त्या देशाची एक इंचही जमीन शेख मुजीबुर यांनी कोणाला दिली नाही. आज युनूस हे बांगलादेशाला अमेरिकेला विकत आहेत हे मोठे दुर्दैव आहे.

महमद युनूस यांनी दहशतवाद्यांच्या मदतीने बांगलादेशात सत्ता काबीज केली, याकडे लक्ष वेधून शेख हसीना म्हणाल्या, यातील अनेक दहशतवादी संघटना अशा आहेत, की त्यांच्यावर आंतरराष्ट्रीय स्तरावर बंदी आहे. युनूस हे दहशतवाद्यांच्या मदतीने सरकार चालवत आहेत. आम्ही दहशतवाद्यांपासून बांगलादेशाच्या नागरिकांना संरक्षण दिले होते. एका दहशतवादी हल्ल्यानंतर आम्ही कठोर पावले उचलली होती, अनेकांना अटक करण्यात आले होते. पण आज तुरुंग रिकामे झाले आहेत, त्या सर्वांना सोडले आहे, असेही शेख हसीना यांनी म्हटले आहे.

अवामी लीगवरील बंदीवर हसीना काय म्हणाल्या?

बंगाली राष्ट्राचे संविधान दीर्घ संघर्ष आणि मुक्ती युद्धातून मिळाले. पण बेकायदेशीरपणे सत्ता काबीज करणार्‍या या नेत्याला संविधानाला स्पर्श करण्याचा अधिकार कोणी दिला? त्यांना जनतेचा जनादेश नाही, कोणताही संवैधानिक आधार नाही. मुख्य सल्लागार या पदाला देखील कोणताही आधार नाही आणि ते अस्तित्वात नाही. मग संसदेशिवाय ते कायदा कसा बदलू शकतात? हे बेकायदेशीर असून त्यांनी अवामी लीगवर बंदी घातली आहे, असे शेख हसीना यांनी नमूद केले.