News - Daily Kesari

उद्धव ठाकरे आणि आदित्य यांनी वैष्णवीच्या वडीलांना दिला धीर

Wrutuja pandharpure
25 May 2025

पिंपरी : शिवसेना पक्षप्रमुख उद्धव ठाकरे आणि युवासेनाप्रमुख आदित्य ठाकरे यांनी वैष्णवीचे वडील आनंद कस्पटे यांच्याशी दूरध्वनीवरून संवाद साधून धीर दिला. यावेळी आमदार सचिन अहिर, जिल्हाप्रमुख गौतम चाबूकस्वार, शहरप्रमुख संजोग वाघेरे उपस्थित होते.’वैष्णवीबाबत झालेली घटना दुर्दैवी आहे. शिवसेना परिवार तुमच्यासोबत आहे. सरकारकडे पाठपुरावा करू. काळजी करू नका, वैष्णवीला न्याय मिळवून देऊ. यासाठी सर्वतोपरी प्रयत्न केले जातील. विधानसभेत आवाज उठविला जाईल. काही मदत लागली तर नक्की सांगा,’ अशा शब्दांत शिवसेना पक्षप्रमुख उद्धव ठाकरे आणि युवासेनाप्रमुख आदित्य ठाकरे यांनी कस्पटे कुटुंबाला शुक्रवारी दूरध्वनीवरून धीर दिला.

दोन कोटी रुपये माहेरहून आणावेत यासाठी सासरच्यांकडून सतत होणारी मारहाण आणि मानसिक छळाला कंटाळून वैष्णवी हगवणे यांनी आत्महत्या केली.

शिवसेना (उद्धव बाळासाहेब ठाकरे) पक्षाचे पुणे जिल्हा संपर्कप्रमुख आमदार सचिन अहिर यांनी वैष्णवी यांच्या आई-वडिलांची वाकड येथील निवासस्थानी भेट घेऊन सांत्वन केले. त्यानंतर त्यांनी शिवसेना पक्षप्रमुख उद्धव

ठाकरे यांचे वैष्णवीचे वडील आनंद कस्पटे यांच्यासोबत दूरध्वनीवरून बोलणे करून दिले. यावेळी उद्धव ठाकरे यांच्याशी संवाद साधताना कस्पटे यांनी ’, माझ्या मुलीला न्याय द्या,’ अशी विनवणी केली. त्यावर बोलताना उद्धव ठाकरे म्हणाले, ’आम्ही सगळे तुमच्यासोबत आहोत. काहीही मदत लागली तर नक्की सांगा. पिंपरी-चिंचवडचे पोलीस आयुक्त विनयकुमार चौबे यांच्याशी बोलणे झाले आहे.

सरकारकडे पाठपुरावा करू, काळजी करू नका, वैष्णवीला न्याय मिळवून देऊ. यासाठी सर्वतोपरी प्रयत्न केले जातील,’ अशा शब्दांत उद्धव ठाकरे यांनी कस्पटे कुटुंबाचे सांत्वन केले.युवासेनाप्रमुख आदित्य ठाकरे म्हणाले, ’तुमच्या परिवारासोबत संपूर्ण शिवसेना परिवार आहे. वैष्णवीला न्याय मिळवून देण्यासाठी जे काही करता येईल ते करू. विधानसभा आणि विधानपरिषद या दोन्ही सभागृहांत याविरोधात आवाज उठविण्यात येईल.’