News - Daily Kesari

महाराष्ट्र

अवकाळी पावसामुळे कुरणेश्वर देवस्थानचे मोठे नुकसान

Wrutuja pandharpure
24 May 2025

सातारा, (प्रतिनिधी) : पावसाचा तडाखा सातारकरांचे श्रद्धास्थान असलेल्या श्री खिंडीतील गणपती आणि कुरणेश्वर देवस्थान ट्रस्टला बसला असून, संरक्षक भिंत पडल्याने, तसेच इतर २० लाख रुपयांचे नुकसान झाले आहे. दरम्यान, बोगदा ते कुरणेश्वर या रस्त्याला मोर्‍या, नाले बांधकाम विभागाने काढलेच नाहीत. त्याबाबत सूचना देऊनही संबंधित विभागाने दुर्लक्ष केल्याने देवस्थानला नुकसानीस सामोरे जावे लागले आहे.

सातार्‍याच्या उत्तरेस बोगद्याच्या पलीकडे कुरणेश्वर देवस्थान आहे. अजिंक्यतारा किल्ल्याच्या पायथाच्या उताराच्या जमिनीवर हे देवस्थान आहे. येथूनच सातार्‍यातून बोगदामार्गे शेंद्रेकडे रस्ता जातो. कुरणेर येथे खिंडीतील गणपती व शंकराचे स्थान आहे. या ठिकाणी कुरणेश्वर देवस्थान ट्रस्टने मंदिराची सुंदर व्यवस्था ठेवली आहे.

औषधी वनस्पतींचा बगीचा येथे केला आहे. मंदिराच्या जागेला एकूणच नैसर्गिक उतार, गर्द झाडी आणि जागृत गणपती देवस्थानामुळे येथे भाविक भेट देतात. पहाटे अनेक नागरिक या मंदिरापर्यंत चालण्याचा व्यायाम करतात. मात्र, काल पावसाने येथे मोठे नुकसान झाले आहे. रस्त्याला तीव्र उतार आहे. रस्त्याच्या एका बाजूला नागरिकांसाठी चालण्याचा रस्ता फेवरब्लॉकने बनविला आहे. मात्र, या रस्त्याला दोन्ही बाजूला पाणी वाहून जाण्यासाठी नालेच नाहीत. त्यामुळे पावसाचे पडणारे सर्व पाणी रस्त्यावरून वाहते. तेथे मंदिराच्या बाजूकडे उतार असल्याने सर्व पाणी मंदिराकडेच जाते. त्यातच येथे काही बांधकाम व्यावसायिक नागरिकांनी राडारोड्याचा ढीग टाकला आहे.

शुक्रवारी मुसळधार पाऊस झाल्याने पाण्याचा मोठा लोंढा मंदिराच्या बाजूला गेला. तेथे राड्यारोड्याच्या ढीगाला लोंढाथटला आणि तो पायर्‍यांवरून मंदिराकडे गेला. या पाण्याचा जोर मंदिराच्या संरक्षक भिंतीला आवरला नाही. पाण्याच्या जोराने सुमारे १५ ते २० फूट भिंत पडली. त्याचप्रमाणे तेथे उभ्या केलेल्या दुचाकीही पाण्याबरोबर मंदिराच्या आवारात उताराने वाहून गेल्या. शिवाय पाण्याने नेलेला गाळ माती मंदिरात आणि मंदिराचा आवारात गेला. फुलांच्या कुंड्यांचेही नुकसान झाले. भिंत पडल्याने आणि एकूणच ट्रस्टचे सुमारे २० लाख रुपयांचे नुकसान झाले आहे.

बोगद्याकडून मंदिराकडे येणार्‍या बोगद्याकडून शेंद्र्याकडे जाणार्‍या रस्त्याला दोन्ही बाजूला नाले, मोर्‍या नाहीत. त्यामुळे पावसाचे सर्व पाणी मंदिरात आले. या रस्त्याला नाले काढण्याबाबत सार्वजनिक बांधकाम विभागाला लेखी कळविले आहे. मात्र, त्यांनी कोणतीही कार्यवाही केलेली नाही.

- शंकरशास्त्री दामले, अध्यक्ष, श्री खिंडीतील गणपती आणि कुरणेश्वर देवस्थान ट्रस्ट