News - Daily Kesari

विदेश

पाकिस्तानला कर्ज देण्याचे नाणेनिधीकडून समर्थन

Samruddhi Dhayagude
24 May 2025

वॉशिंग्टन : पाकिस्तानला मंजूर करण्यात आलेल्या एक अब्ज डॉलर्स कर्जाचे आंतरराष्ट्रीय नाणेनिधीने (आयएमएफ) समर्थन केले आहे. पाकिस्तानने सर्व अटी आणि उद्दिष्टे पूर्ण केल्यामुळेच हा निधी मंजूर करण्यात आला, असे आयएमएफने म्हटले आहे.भारत आणि पाकिस्तानात लष्करी संघर्ष सुरू असतानाच आयएमएफने विस्तारित निधी सुविधेअंतर्गत पाकिस्तानला १ अब्ज डॉलर्सचे कर्ज मंजूर केले होते. भारताचे संरक्षण मंत्री राजनाथ सिंह यांनी १६ मे रोजी आयएमएफला आर्थिक मदतीचा फेरविचार करण्यास सांगितले होते.

दरम्यान, आयएमएफच्या संपर्क विभागाच्या संचालक ज्युली कोझॅक यांनी पाकिस्तानला दिलेल्या निधीचे समर्थन केले. गेल्या वर्षी सप्टेंबरमध्ये पाकिस्तानला देण्यात आलेल्या विस्तारित निधी सुविधेचा (ईएफएफ) आढावा घेतल्यानंतर कार्यकारी मंडळाने ९ मे रोजी ही रक्कम मंजूर केली, असे कोझॅक यांनी सांगितले.

पहलगाममधील दहशतवादी हल्ल्यानंतर भारताने ‘ऑपरेशन सिंदूर‘ अंतर्गत पाकिस्तावर कारवाई केली. त्यानंतरही, पाकिस्तानची खुमखुमी कायम होती. मात्र, भारताने आक्रमक पवित्रा घेतल्यानंतर पाकिस्तानला नमते घ्यावे लागले.

यादरम्यान, आंतरराष्ट्रीय नाणेनिधीची (आयएमएफ) वॉशिंग्टनमध्ये बैठक पार पडली. या बैठकीत पाकिस्तानच्या निधीबाबत चर्चा झाली. त्यावेळी भारताने यासंदर्भातील प्रस्तावास तीव्र आक्षेप घेतला होता. या निधीचा वापर पाकिस्तान दहशतवादी कारवायांना पाठिंबा देण्यासाठी करत आला असल्याचे सांगत मतदानावेळी भारत गैरहजर राहिला होता.

विशेष म्हणजे, दोन दिवसांपूर्वीच आयएमएफने पाकिस्तानवर ११ नव्या अटी घातल्या होत्या. भारताबरोबरील तणाव या कर्जयोजनेतील आर्थिक, बाह्य आणि सुधारणांची उद्दिष्टे धोक्यात आणू शकतात, असा इशारादेखील नाणेनिधीने दिला होता. नाणेनिधीने पाकिस्तानवर घातलेल्या अटींची संख्या यामुळे ५० वर पोहोचली आहे.