News - Daily Kesari

महाराष्ट्र

मुंबई महानगर देशातील स्टार्टअपचे हब

Samruddhi Dhayagude
22 May 2025

मुंबई, (प्रतिनिधी) : स्टार्टअप आणि उद्योगांना आर्थिक साहाय्य देण्यासाठी फिनटेक धोरण तयार करणारे महाराष्ट्र हे देशातील पहिले राज्य आहे. देशातील सर्वाधिक निधी प्राप्त करणार्‍या स्टार्टअपचे मुंबई हब बनले असून देशाच्या एकूण स्टार्टअप्सपैकी २४ टक्के महाराष्ट्रात आहे. त्यामुळे महाराष्ट्र स्टार्टअप्समध्ये संपूर्ण देशात अग्रेसर आहे, असे प्रतिपादन उपमुख्यमंत्री एकनाथ शिंदे यांनी बुधवारी येथे केले. गोरेगाव येथील नेस्को सेंटर येथे सीएसआयआर आणि तीन प्रमुख वैज्ञानिक संस्थांच्या संयुक्त विद्यमाने ’स्टार्टअप कॉन्क्लेव्ह २०२५’ आयोजन करण्यात आले आहे.

यावेळी शिंदे म्हणाले, महाराष्ट्र स्टार्टअप्सच्या बाबतीत संपूर्ण देशात क्रमांक एकवर असून २०२५ च्या आर्थिक पाहणीनुसार, महाराष्ट्रात २६ हजार ६८६ स्टार्टअप्स आहेत. जे देशातील एकूण स्टार्टअप्सच्या २४ टक्के आहे. गुंतवणूकदार आणि व्हेंचर कॅपिटल फंड्सच्या उपलब्धतेमुळे मुंबई स्टार्टअप्ससाठी सर्वात योग्य ठिकाण बनले आहे.

राज्यात ‘महाराष्ट्र स्टार्टअप वीक’, ‘मुंबई फिनटेक हब’ आणि ‘पुण्यश्लोक अहिल्यादेवी होळकर महिला स्टार्टअप योजना’ तयार केल्या आहेत. त्यामुळे मुंबई हे आर्थिक आणि तांत्रिक इनोव्हेशनचे केंद्र बनले आहे, असेही शिंदे म्हणाले.