News - Daily Kesari

गुन्हेगारी जगत

युवासेना जिल्हाप्रमुख निलेश घारे यांच्या मोटारीवर गोळीबार

Wrutuja pandharpure
21 May 2025

पुणे : शिवसेना युवासेना जिल्हाप्रमुख निलेश घारे यांना अभिलेखावरील गुन्हेगाराने फोनवरून धमकी दिली होती. त्यानंतर, रात्री उशिरा त्यांच्यावर गाडीवर गोळीबार करण्याचा धक्कादायक प्रकार गणपती माथा येथील त्यांच्या कार्यालयाबाहेर सोमवारी रात्री अकराच्या सुमारास घडला. दुचाकीवरून आलेल्यांनी एक गोळी त्यांच्या मोटारीवर झाडली आणि पळ काढला.

निलेश घारे हे सोमवारी आपल्या जनसंपर्क कार्यालयात कार्यकर्त्यांसोबत बसले होते. कार्यालयाबाहेर त्यांनी मोटार लावली होती. त्यावेळी, दुचाकीवरुन आलेल्या दोघांपैकी एकाने त्यांच्या मोटारीवर गोळीबार केला. त्यातील एक गोळी मोटारीच्या काचेला लागली. घटनेची माहिती मिळताच वरिष्ठ पोलीस अधिकारी घटनास्थळी दाखल झाले. सीसीटीव्हीमध्ये दोघे जण दुचाकीवरुन येताना दिसतात. त्यातील एक जण पिस्तुलातून गोळी झाडताना दिसून येत आहे. न्यायवैद्यक पथकाने येऊन घटनास्थळाचा पंचनामा केला.

निलेश घारे यांना वारजे माळवाडी भागातील एका सराईत गुन्हेगाराने सोमवारी धमकीचा फोन केला होता. या धमकीच्या फोनबाबत घारे यांनी वारजे माळवाडी पोलिसांना माहिती दिली. त्यानंतर, काही वेळाने गोळीबाराची घटना घडली. गोळीबार करणारे आणि धमकी देणारे आरोपी फरार झाले असून पोलीस त्यांचा शोध घेत आहेत. दरम्यान, काही वर्षांपासून निलेश घारे यांनी आपल्या जिवाला धोका असल्याने पोलीस संरक्षण मिळावे, असा अर्ज केला असल्याचे पोलीस उपायुक्त संभाजी कदम यांनी सांगितले.