News - Daily Kesari

देश

तुमचा ढोंगीपणा थांबवा; माफी मिळणार नाही!

Wrutuja pandharpure
19 May 2025

विजय शाह याला सर्वोच्च न्यायालयाने फटकारले

नवी दिल्ली : कर्नल सोफिया कुरेशी यांच्याबाबत वादग्रस्त विधान करता आणि पुन्हा माफी कशी मागता ? तुमचा ढोंगीपणा थांबवा, अशा शब्दांत मध्य प्रदेशाचे मंत्री विजय शाह याला सर्वोच्च न्यायलयाने सोमवारी फटकारले.

कर्नल सोफिया कुरेशी यांच्याबाबत वादग्रस्त विधान केल्यानंतर कारवाई करण्याचे आदेश उच्च न्यायालयाने नुकतेच दिले होते. प्रकरण आता सर्वोच्च न्यायालयात पोहोचले आहे. या प्रकरणी काल सुनावणी झाली. तेव्हा विजय शाह याने माफी करावी, अशी विनंती न्यायालयात केली होती. त्यावरुन न्यायालयाने त्यांचे कान उपटले आहेत. अगोदर वादग्रस्त विधान करता नंतर माफी कशी मागता ? असा प्रश्न करत नक्राश्रू ढाळू नका, तुमचा ढोंगीपणा थांबवा, अशा शब्दांत न्यायालायाने शाह याला काल फटकारले आहे.

न्यायाधीश सूर्यकांत आणि एन. कोटीश्वर सिंग यांच्या पीठासमोर विजय शाह याने माफी मागितली होती. त्याचा अर्ज पीठाने फेटाळून लावला आहे. विचार न करता तुम्ही विधान केले आहे. त्यामुळे आम्ही तुम्हाला माफी देऊ शकत नाही. कायदेशीर कारवाईपासून वाचण्यासाठी ढोंगीपणा करुन, नक्राश्रू तर अजिबात ढाळू नका, असा शब्दांत त्याला फटकारले आहे. लोकप्रतिनिधीने शब्द जरा जपूनच वापरले पाहिजेत, अशा शब्दांत खडसावले देखील आहे.