ब्रेकिंग

महाराष्ट्र

विदर्भ, मराठवाड्यात पाऊस कायम

Samruddhi Dhayagude
02 Jun 2025

मध्य महाराष्ट्रात हलका ते मध्यम पावसाची शक्यता

पुणे : मान्सून राज्यात स्थिरावला असला, तरी विदर्भ, मराठवाड्यात वादळी वार्‍यासह जोरदार पाऊस कायम आहे. विदर्भात पुढील आठवडाभर मेघगर्जना, वीजांचा कडकडाट आणि वादळी वार्‍यासह जोरदार पावसाचा अंदाज वर्तविण्यात आला आहे. मराठवाड्यातील बहुतांश भागात पाऊस कायम असणार असल्याचा अंदाज हवामान विभागाने रविवारी वर्तविला आहे.

मध्य महाराष्ट्र आणि कोकणात पुढील तीन दिवस हलका ते मध्यम स्वरूपाचा पाऊस असणार आहे. त्यानंतर मात्र मेघगर्जना, वीजांचा कडकडाट आणि वादळी वार्‍यासह पावसाचा अंदाज वर्तविण्यात आला आहे. विदर्भात वादळी वार्‍यासह पाऊस पडणार असल्याने विदर्भासाठी यलो अलर्ट देण्यात आला आहे. मध्य महाराष्ट्रातही ५ जूननंतर पाऊस वाढणार असल्याचा अंदाज आहे. राज्यातील घाट विभागातील पावसाचे प्रमाणही कमी झाले आहे. काही भागात ढगाळ वातावरणासह वारे वाहत आहेत.

मागील २४ तासात कोकण, गोव्यात काही ठिकाणी मध्य महाराष्ट्र, मराठवाडा आणि विदर्भात तुरळक ठिकाणी पाऊस पडला. कोकण, गोवा, मध्य महाराष्ट्रात कमाल तपमान सरासरीच्या जवळपास होते. राज्यात काल ब्रह्मपुरी येथे उच्चांकी ३९.२ अंश कमाल तपमानाची नोंद झाली. काल दिवसभर राज्यातील काही भागात वादळी वार्‍यासह जोराचा पाऊस पडला, तर काही भागात ढगाळ वातावरणासह पावसाच्या हलक्या सरी कोसळल्या. तर काही भागात पावसाची विश्रांती कायम आहे.

पुण्यात पावसाची हजेरी

मागील तीन दिवसांपासून शहर आणि परिसरात पावसाने विश्रांती घेतली होती. मात्र रविवारी सकाळपासून शहर आणि परिसरात पावसाला सुरुवात झाली आहे. काल सकाळी ढगाळ वातावरणासह शहरातील बहुतांश भागात पाऊस पडला. त्यानंतर दुपारी पावसाच्या हलक्या सरी कोसळल्या. त्यानंतर पुन्हा सायंकाळी शहर आणि उपनगरात हलक्या सरी कोसळल्या. रात्री उशीरापर्यंत ढगाळ वातावरण कायम होते. पावसामुळे उकाड्यात काही प्रमाणात घट झाली होती.