News - Daily Kesari

गुन्हेगारी जगत

तपासाच्या नावाखाली पोलिसांनीच उकळले २५ तोळे सोने

Wrutuja pandharpure
13 May 2025

उपायुक्तांकडून दंडात्मक कारवाई

पुणे : तपास करण्याच्या बहाण्याने पुण्यातील पोलिस कर्मचार्‍यांनी परराज्यात जाऊन सराफ व्यावसायिकाकडून डिसेंबर २०२४ ते जानेवारी २०२५ या कालावधीत २५ तोळ्यांपेक्षा जास्त सोने उकळल्याचे समोर आले. याबाबत सराफ व्यावसायिकाने दिलेली तक्रार मागे घेतल्यामुळे संबंधित कर्मचार्‍यांवर कठोर कारवाई करता आली नाही. मात्र, या चारही पोलीस कर्मचार्‍यांना प्रत्येकी पाच हजार रुपये दंडाची शिक्षा परिमंडळ पाचचे पोलीस उपायुक्त डॉ. राजकुमार शिंदे यांनी सुनावली. या प्रकारामुळे पोलिसांच्या विश्वासार्हतेवर पुन्हा एकदा प्रश्नचिन्ह उपस्थित झाले आहे.

हवालदार महेश विठ्ठल गाढवे, हवालदार सर्फराज नूरखान देशमुख, पोलीस शिपाई संदीप आनंदा साळवे, पोलीस शिपाई सोमनाथ पोपट कांबळे अशी कारवाई करण्यात आलेल्या पोलीस कर्मचार्‍यांची नावे आहेत. चौघेही वानवडी पोलीस ठाण्यात नेमणुकीस आहेत. याबाबत सराफ व्यावसायिक कपिल मफतलाल जैन (बल्लारी, कर्नाटक) यांनी तक्रार दिली होती.

वानवडी पोलीस ठाण्यात दाखल चोरीच्या गुन्ह्याच्या तपासासाठी देशमुख, साळवे आणि कांबळे हे कर्नाटकमधील बल्लारी शहरात गेले होते. संबंधित चोरट्याने चोरीचा सुवर्णहार सराफा व्यावसायिक जैन यांच्याकडे गहाण ठेवला होता. संबंधित सुवर्णहार गहाण ठेवल्याची पावती पोलिसांनी चोरट्याकडून ताब्यात घेतली होती. ही पावती चौघांनी जैन यांना दाखविली. जैन यांनीही सुवर्णहार गहाण ठेवून चोरट्याला ३० हजार रुपये दिल्याचे कबूल केले. त्यावेळी चौघांनी जैन यांना ‘तू चोराकडून एक हजार ग्रॅम सोने घेतले’ असे सांगून त्यांच्यावर दबाव आणला. त्यानंतर जैन यांच्या मुलाला बोलविले. ‘चोरीचे एक हजार सोने पुढील तपासासाठी आमच्या ताब्यात दे. तू ज्यांच्याकडून सोने घेतले आहे ते कोयता गँगचे लोक आहेत. त्यांनी पोलिसांवरही हल्ला केला आहे’, असे सांगत जैन यांच्यावर दबाव टाकला. तसेच, त्यांना २७९.९८ ग्रॅम सोने देण्यास भाग पाडले. त्यांच्याकडून सोने घेऊन चारही पुण्यात आले.

जैन यांनी स्थानिक पोलीस ठाणे गाठले आणि याप्रकरणाविषयी माहिती दिली. स्थानिक पोलिसांनी वानवडी पोलीस ठाण्यात याप्रकरणाबद्दल चौकशी केली. तेव्हा असे कोणतेही सोने चोरट्यांकडून जप्त केले नसल्याचे वानवडी पोलिसांकडून कळविण्यात आले. त्यानंतर पोलीस कर्मचारी गाढवे, देशमुख, साळवे, कांबळे यांनी जैन यांच्याकडून बळकविलेले सोने आपसात वाटून घेतल्याचे उघडकीस आले. त्यानंतर जैन यांनी पोलिसांत तक्रार दिली. वानवडी विभागाच्या सहायक पोलीस आयुक्त आणि परिमंडळ पाचचे पोलीस उपायुक्त डॉ. राजकुमार शिंदे यांनी चौकशी करून ही कारवाई केली.