ब्रेकिंग

महाराष्ट्र

लाडक्या बहिणींसाठी पुन्हा आदिवासींच्या निधीवर डल्ला

Wrutuja pandharpure
24 May 2025

महिला आणि बालविकास खात्याकडे वळवले ३३५ कोटी

मुंबई, (प्रतिनिधी) : महायुती सरकारच्या महत्त्वाकांक्षी ’मुख्यमंत्री माझी लाडकी बहीण’ योजनेसाठी पुन्हा एकदा आदिवासी विकास खात्याच्या निधीवर पुन्हा डल्ला मारण्यात आला आहे. लाडक्या बहिणींसाठी ३३५ कोटी ७० लाखांचा निधी महिला आणि बालविकास खात्याकडे वळवण्यात आला आहे. आदिवासी विकास विभागाने शुक्रवारी यासंदर्भातील शासन निर्णय जारी केला. हा निधी लाडक्या बहिणींना मे महिन्याच्या हप्त्यापोटी दिला जाणार आहे.

गेल्या वर्षी विधानसभा निवडणुकीच्या तोंडावर महायुती सरकारने पात्र महिलांना दर महिना १ हजार ५०० रुपये देणारी ’मुख्यमंत्री माझी लाडकी बहीण योजना’ जाहीर केली. सरकारने निवडणुकीपूर्वी योजनेतील लाभार्थी महिलांना पाच महिन्यांचे हप्ते दिले. मात्र, विधानसभा निवडणुकीनंतर पुन्हा सत्तेत आलेल्या महायुती सरकारला तिजोरीत पैसे नसल्याने लाडक्या बहिणींना नियमितपणे हप्ते देणे अवघड बनले आहे.

बहिणींच्या बँक खात्यात दर महिना १५०० रुपये जमा करताना सरकारची आर्थिक आघाडीवर दमछाक होऊ लागल्याने सरकारला आता मागासवर्गीय आणि आदिवासी समाजासाठी कल्याणकारी योजना आखणार्‍या सामाजिक न्याय तसेच आदिवासी विकास खात्याचा निधी वळवावा लागत आहे. राज्य सरकारने २०२५-२६ या वर्षीच्या अंदाजपत्रकात अनुसूचित जमाती उपयोजनेसाठी २१ हजार ४९५ कोटींची तरतूद केली आहे. यापैकी आदिवासी विकास खात्याला देण्यात आलेल्या ३ हजार ४२० कोटींच्या सहाय्यक अनुदानातून मे महिन्यासाठी ३३५ कोटी ७० लाखांचा निधी लाडकी बहीण योजनेसाठी वळविण्यात आला आहे. एप्रिल महिन्यात सुद्धा ३३५ कोटी ७० लाखांचा निधी महिला आणि बालविकास विभागाकडे वर्ग करण्यात आला होता. आता आदिवासी विकास खात्यातून प्रत्येक महिन्याला असा निधी वळता केला जाणार आहे.